Isumat.com/Hulyo 29, 2022
Nagin kampeon ngan naghakot hin medalya hi PCpl Claudine Mae Chicano Carcillar dida han gindumara nga 2022 World Police And Fire Games ha Rotterdam, Netherlands hadton Hulyo 22-31, 2022.
An taga Can-avid, Eastern Samar nga hi Carcillar in nakadaog han gold medal ha Womens’ Kumite Over 60Kg Division kun diin iya ginperde ha finals hi Katerina Synenko han Ukraine National Police.
Hi Carcillar nga naka-assign ha Dasmarinas City Police Station ha Cavite, in nakadaog gihapon hin silver ha Womens Team Kata ngan bronze medal dida han Women’s Team Kumite.
Hadton 2019 World Police and Fire Games ha China, hi Carcillar in nakadaog hin silver medal ha karatedo.
Hiya in nagtapos han kolehiyo ha kurso nga Criminology ha Leyte Colleges, Tacloban ngan kaparte gihapon hiya han mga banggiitan nga karatedo players han Advocacy for the Strengthening of Karatedo (ASK)-Tacloban nga pinamumunuan ni Hanshi Bimbo Franco.
Hi Carcillar in damo na an natirok nga mga medalya ha mga lokal, national ngan international karate tournaments.
An World & Fire Police Games in gin-aapihan hin 10 Mil nga mga atleta tikang hin 70 nga mga nasyon ha bug-os nga kalibutan kun diin an mga magmurulay in mga nagtatrabaho ha Police, Fire ngan Rescue nga mga ahensya. #
