Isumat.com/Hulyo 29, 2022
Nagka-aaresto in usa nga Barangay Chairman ngan usa nga empleyado hin bungto ha magkalain nga operasyon kontra han iligal nga droga nga gindumara han mga otoridad hadin nakalabay nga adlaw.
Ginkilala an suspetsado nga hi Mariovic Jaradal, Chairman han Brgy Potong, San Julian, Eastern Samar dida han buy-bust operation nga gindumara han mga operatiba han PDEA ngan PNP.
An operasyon in natabo ha Brgy Maglipay, Sulat, E. Samar hadton Hulyo 27, 2022 kun diin lima ka sachet hin gin-aalegar nga shabu an nakuha tikang han gintatahapan ngan nagkakantidad ini hin 19, 303 pesos.
Ha luyo nga bahin, nasikmit naman an suspetsado nga hi Jovito Soquino, 47 anyos, residente han Brgy Poblacion, Albuera, Leyte hadton Hulyo 28, 2022.
Hi Soquino, emplayado han Mayor’s Office han mao nga bungto in nakuhaan hin pito ka sachet hin gin-aalegar nga shabu balor hin 10 Mil pesos.
An mga tropa han PDEA, PNP ngan 93rd Infantry Battalion han Philippine Army an nagburublig hini nga operasyon.
Samtang, pasado alas 5 han kulop, Hulyo 27, an mga kapulisan han Tacloban Police Station 2 in nakadakop kan alyas Albert dida hin buy-bust operation ha New Bus Terminal, Abucay.
Narekupo tikang han suspetsado in unom ka sachet hin iligal nga droga kantidad hin 16 Mil pesos.
An tulo nga suspetsado in detenedo yana ha magkalainlain nga karsel ngan nakatalaan umatubang han mga kaso nga igsasampa kontra ha ira. #
