Isumat.com/3:53AM, September 29, 2020
Magpapadayon pa an pag-implementar han General Community Quarantine (GCQ) ha syudad han Tacloban ngan ini in tobtob pa hiton Oktobre 31, 2020.
Ini in subay han desisyon han National Inter-Agency Task Force on Covid-19. Igin-anunsyo ini kagab-i han Malakanyang dungan han pagpasamwak nga magpapabilin gihapon an GCQ ha Metro Manila ha masunod nga bulan. Lakip gihapon han GCQ amo an Iloilo City ngan Bacolod City.
An iba naman nga parte han Eastern Visayas in aada ha Modified MGCQ.
Ini nga desisyon han National IATF in agud magpabilin an mas istrikto nga paglimitar han gi-os han katawhan ngan limitado nga operasyon han mga establisemento basi kabalabgan an pagsarang han ginkakahadlukan nga kagaw.
Hapagkayana, porlomenos 130 an Active Cases ha Tacloban. Umabot na ha 754 an nagpositibo han virus nga mga Taclobanon, kun diin 610 na an naka-recover ngan 11 nga pasyente han Covid an naawat an kinabuhi.
Kasumpay hini, ginlalauman nga magpapagawas hin bag-o nga Executive Order hi Mayor Alfred Romualdez tungod hini nga desisyon han National IATF. Matatapos na unta ha Setyembre 30 an GCQ nga iginmando ni Romualdez para han syudad, pero kagab-i nagdesider an National IATF nga igpapailarum la gihapon ha GCQ an Tacloban ha masunod nga usa ka bulan.
Samtang, nadugangan hin 41 an mga kaso han Covid ha Sinirangan Bisayas subay han report kagab-i han DOH Regional Office. Dara hini, aada na 4,591 an nagkatatapnan ha bug-os nga rehiyon.
An naka-recover in umabot na ha 3,875 (84%), ug an namatay in 41 nga pasyente. An Active Cases hapagkayana in 675.
An Catbalogan City an gidadamu-i an nagpositibo dida hini nga report kagab-i kay 12 katawo an nahidugang han nagkatatapnan. 633 na an naigo han virus nga mga Catbaloganon ngan 501 an nakatalwas tikang han sakit. Mayda naman 129 nga Active Cases an syudad hapagkayana. #
