Isumat.com/1:04PM August 17, 2020
Namatay in usa nga 4-anyos nga babayehay samtang nagin abo naman in 16 nga kabablayan dida hin magkalain nga panhitabo hin sunog ha Allen, Northern Samar ngan Isabel, Leyte.
Dida han maagahon hadton Sabado, na-ugbaw in usa nga balay ha Brgy Jubasan, Allen ug namatay dida han insidente an 4-anyos nga hi Josephine Jablesi. Nag-antos naman hin mga kasamdan hira Jason Jablesi, Imelda Rossel, Jose Lebrinio ngan Epifanio Tamparia.
Dida han imbestigasyon, napasibay-an an dinagkutan nga kandila dida han panimalay hinungdan han paglalahinggab han kalayo.
Ha luyo nga bahin, 16 nga kabablayan an nagkasusunog didto ha Brgy San Roque, Isabel, Leyte hadton alas 9 han aga han Sabado.
Nagpahayag an BFP-Isabel nga an kalayo in nagtikang ha balay ni Victor Lawas ngan na-alakbatan an paghagrani nga kabablayan.
Nagsumat hi Lawas nga an iya apo in nagmulay hin posporo upod an mga kapapturan didto han ira balay ngan ini an gintotoohan nga kawsa han kalayo. Waray naman nahireport nga namatay o nasamad dida hini nga panhitabo.
Kantidad hin 500 Mil pesos an danyos han nasabi nga sunog nga naparong katapos hin usa ka oras. #
