Isumat.com/Setyembre 27, 2022
Igin-alay hin usa nga sundalo an iya kinabuhi ha pagproteher han mga baryuhanon ha usa nga engkwentro kontra han mga rebelde nga NPA ha Victoria, N. Samar kakulop, Setyembre 26, 2022.
Ha report han Philippine Army, an mga tropa nga kaapi han 3rd Infantry Battalion in nakakarawat hin impormasyon nga may armado nga grupo nga nangingikil hin salapi ngan pagkaon ha mga residente han Brgy Luisita han nasabi nga bungto.
An mga kasundaluhan in naghimo hin patrolya tungod hini nga report, ngan samtang ginhihimo nira an operasyon ha kabubkiran han mao nga lugar, iginkahibalag hira han grupo han mga terorista banda alas 8 an takna han aga.
Tungod han pakalas nga pag-atake han mga rebelde, naigo ha iya liog hi Cpl Loreto Cachola Jr hinungdan han iya dayon nga kamatayon.
Hi Cachola in kaparte han Mobile Community Support Sustainment Team nga nabulig han mga barangay nga mahipadayon an kamurayawan tikang mawara ha ira lugar an impluwensya han mga komunista.
Gintotoohan nga an mga rebelde in ginpangunahan ni Ka Normie nga amo an gintutudlok nga nangingikil hin kwarta ngan pagkaon tikang han mga residente didto.
An Philippine Army in kadagmitan nagpasarang hin kadugangan nga pwersa basi paghalpaton an grupo han mga rebelde.#
