Isumat.com/1:32PM, August 17, 2020
Imbes nga mabulig pagpoypoy han iligal nga droga, usa nga sundalo an nagbaligya hin shabu hinungdan nga nadakop hiya han mga otoridad.
Ginkilala han kapulisan an suspetsado nga hi Army Corporal Raffy Garcia, 33 anyos, inasaw-an ngan taga Sta Margarita, Samar. Hiya in naka destino ha 8th Infantry Division nga nakabase ha Catbalogan, Samar. Lakip gihapon nga na-aresto an upod ni Garcia ngahi Renalyn Artiga, 23 anyos, taga Calbayog City.
Dida han report han PNP, an mga tinubyanan han balaud an nagdumara han buy-bust operation ha Brgy Maulong, Catbalogan City kun diin nakapalit an mga operatiba hin duha ka sachet hin gin-aaligar nga shabu tikang han mga suspetsado.
Nakumpiskar gihapon tikang kan Garcia in duha nga cellphones, usa nga pistola ngan mga bala.
Samtang, usa naman nga barangay kagawad an gindakop tungod han iya paghipos hin magkalainlain nga kalibre hin armas de fuego ngan mga bala.
An suspetsado in ginkilala nga hi Ramir Vitanghos, 48-anyos, residente ngan kagawad han Brgy Divisoria, Alangalang, Leyte.
Pinaagi han search warrant nga ginpagawas han RTC Branch 44-Tacloban, ginrekupo han mga kapulisan dida han balay ni Vitanghos an masunod: duha nga caliber .22 rifle, duha nga air gun, usa nga 12-gauge shotgun, duha nga kalibre .22 nga pistola, usa nga 357 revolver, duha nga kalibre 38 nga pistola, ngan usa nga browning shotgun. Tanan han mga pusil in waray mga serial numbers. Kadam-an gihapon nga klase hin bala an nakumpiskar dida han iya panimalay.
Gintotoohan han mga otoridad nga lider hin sindikato nga nagi-os ha Leyte hi kagawad Vitanghos.
An nagdumara han operasyon amo an mga kaapi han Leyte PNP Provincial Office, Alangalang PNP ug an CIDG. #
