Isumat.com/Oktubre 31, 2022
Dida han nag-agi nga tulo ka adlaw, nagsagunson an mga trahedya ngan kalamidad an natabo ha magkalainlain nga parte han kalibutan kun diin sobra 300 katawo an kumpirmado nga nagkamamatay ngan kadam-an pa nga iba an ginpipinamiling pa tobtob han ginsusurat ini nga notisya.
Ha Pilipinas, subay han report nga iginpagawas han National Disaster Risk Reduction Management Council (NDRRMC) han Oktubre 31, 2022, porlomenos 98 katawo na an naawat an kinabuhi tungod han pagdagmal ni bagyo Paeng.
Kasagaran han nagkamamatay in tikang ha Bangsamoro Autonomous Region ha Mindanao dara han pagbabaha ngan mudslides. Hapagkayana, 31 pa ka tawo an nagkakawawara.
Samtang, 153 katawo an namatay han magkaada hin stampede ha Itaewon District, South Korea kun diin ginatos-gatos nga indibiduwal an nagtarampoog ha haligutay nga kalsada basi magrayhak ngan magselebrar han halooween. Natabo ini han Oktubre 29.
Kadam-an han mga nagkamamatay in mga batan-on pa ngan ginkakabarak-an nga madudugangan pa an ihap han mga namatay tungod kay damo pa in aada ha kritikal nga sitwasyon an kinabuhi samtang gintatambal ha mga hospital.
Samtang, dida han haros parehas nga oras han Oktubre 29, usa nga tulay ha India an nahirusdak kun diin porlomenos 81 katawo an namatay.
Subay han report, an tulay ha probinsya han Gujarat in pira pala ka adlaw nga gin-abrihan basi magamit han publiko ngan transportasyon katapos hin pira ka bulan nga pag-ayad.
Han matabo an insidente, ginbabanabana nga sobra 400 katawo an didto han tulay ngan posible waray maka-akos an tulay han ira kabug-aton.
Ngan didto naman ha nasud han Congo ha Africa, 11 katawo an namatay han matabo in usa nga stampede ha Martyr’s Stadium durante han concert ni African music star Kally Ipupa hadin Oktubre 30.
Ha inisyal nga imbestigasyon, upod han nagkamamatay in duha nga kapulisan.
Subay han pahayag han mga otoridad, nagsobra hin 100 Mil an mga magkirita, imbes nga 80 Mil la an kapasidad han stadium ngan waray na kakontrol an gi-os han katawhan. #(Photos CTTO)
