Isumat.com/Agosto 19, 2021
Naawat an kinabuhi hin usa nga lolo han pagpanmumusilon hiya hin usa nga Job Order Employee kakulop, Agosto 18, ha Laoang, Northern Samar.
Ginkilala an biktima nga hi Victoriano Chan, 64 anyos, inasaw-an ngan nag-uukoy ha Brgy Bobolosan, samtang an suspetsado amo hi Rio Chua, 39 anyos, inasaw-an, LGU Job Order nga empleyado ngan residente han Brgy Rawis.
Subay han imbestigasyon, maiha na nga mayda deri pagka-asya an biktima ngan gintatahapan. Hadto nga adlaw, pasado alas 9 an takna han aga, nagkatapo an duha ha compound han munsipyo han bungto.
Tigda la nga ginbunlot ni Chua an iya pusil ngan pabuthan hin pira ka beses hi Chan nga nag-antos hin mga igo ha iya lawas hinungdan han iya kamatay.
An suspetsado in sumurender ha mga otoridad waray la pag-iha katapos han insidente. #
