Isumat.com/ Disyembre 15, 2022
Malina-umon hi Baybay City Mayor Jose Carlos Cari nga maabot an panahon nga may mga indibiduwal tikang han mao nga syudad nga makakakarawat hin pasidungog komo National Artist.
Ini an usa han mga hinungdan kun kay-ano nahimugso an School for the Arts ha Baybay City nga titikangan na an operasyon ngan pagtutdo ha mga intresado yana nga Disyembre 2022.
Sumala kan Cari, kinahanglan mapadukwag ngan masustener an pagba-id han mga talentado nga mga Baybayanon ha larangan han Arts ngan ini nga instutusyon an magigin dalan para hini nga tinguha.
Ha syahan nga pag-arangkada han mao nga facilidad, titikangan na an pagtutdo han Visual Arts hit Disyembre 17, samtang an Dance Classes hiton Disyembre 19. Sumala pa han report, waray bayad an pag-eskwela han mga Baybayanon dida hini nga facilidad.
Sunod nga tuig, madudugangan pa hin iba nga kurso an igtututdo ha Baybay City School for the Arts.
Hi Leyte 5th District Congressman Carl Nicolas Cari in nag-alutaga hin pondo nga 20 Milyones pesos para han paghimo han building, samtang an LGU-Baybay an pumalit han lote nga gintindugan hini.
An School for the Arts in namumutang ha Binaybayon Complex, Diversion Road, Brgy Hibunawan han nasabi nga syudad. # (via Baybay City Updates)
