Isumat.com/1:17PM, September 03, 2020

Basta gud man aada ha impluwensya hit alkohol, bisan mga otoridad deri gintatahod ngan ginsusulong lugod.

Ini in natabo ha Brgy Dapdap, Alangalang, Leyte kanina han pasado alas 2 han maagahon han pagpaninigbason han suspetsado nga hi Rodulfo Maurillo hi Police Sgt. Jon Alvin Claro.

Dida han report han Alangalang PNP, nakakarawat hira hin impormasyon tikang hin usa nga kagawad han nasabi nga barangay mahitungod hin lalaki nga hubog nga naghihimo hin kasamok ngan nagpipinan-ngayat hin agway bitbit an sundang.

Kadagmitan pumakadto han barangay an kapulisan ha panguna ni Claro ngan ira ginsaway hi Maurillo nga residente han mao nga lugar. Imbes nga manmati ha mga otoridad, duroy nga nagribok an suspetsado ngan gin-atake hi Claro ngan ginpaninigbas. An biktima in nag-antos hin kasamdan ha magkalainlain nga parte han iya lawas.

Tungod hini, napwersa an iba nga pulis nga pabuthan an suspetsado. Naigo an suspetsado pero nakahimo pa ini pakadalagan ngadto han masighot nga parte han lugar. Ginlanat hi Maurillo han mga otoridad ngan nadakop.

Nakumpiskar gihapon an sundang nga gingamit dida han insidente.

An nasamad nga pulis in gindara ha pribado nga hospital ha Tacloban City, samtang an suspetsado in nadara ha Leyte Provincial Hospital ha Palo, Leyte. Iginreport nga talwas na ha peligro an duha.

An PNP Alangalang in nakatalaan magsampa han kaangayan nga mga kaso kontra han Maurillo. #