(Image by whatalife.ph)

Isumat.com/7:12AM, June 7, 2020

Para han mga kwalipikado nga pamilya nga waray mahi-agom han Social Amelioration Program (SAP) Cash Assistance, mayda niyo tsansa nga makatagamtam hini kun may aksyon an iyo LGU.

Ini in mahitungod nga tobtob nala dida hiton Hunyo 10, Mierkules, an pagsubmiter han mga ngaran han beneficiario basi makakarawat hira kun magkamay-ada han ikaduha nga panhatag han SAP.

Hi DSWD Regional Director Marie Angela Gopalan in nanawagan ha mga LGUs nga igsubmiter na an lista han “waitlisted” nga beneficiario han ayuda nga tag-5 mil pesos. Dida hiton Hunyo 10 an deadline basi igpadangat ha DSWD an lista han mga kwalipikado nga pamilya nga waray makakarawat dida han syahan nga arangkada han panhatag.

Ginklaro ni Gopalan nga kinahanglan an nasabi nga listahan in mayda certipikasyon nga pirmado han Municipal o City Social Welfare Officer ug han alcalde han LGU.

Kun aton manunumduman, damo an nag-arungot nga waray hira mahi-agom han ayuda pinansyal nga ginhatag han gobyerno para han nawarayan hin pakabuhi ug mga kablas nga pamilya tungod han COVID-19 pandemic.

Mayda liwat mga nagkabibisto nga deri angay tagan pero nakatagamtam. Sobra usa ka gatos nga mga barangay officials an ginsampaan hin kaso dara hin mga milagro dida han panhatag.

Ha bug-os nga Pilipinas, maabot hin 5 milyones nga pamilya an waray makatagamtam hini bisan kun kwalipikado hira.

Tobtob yana, waray pa liwat iginpagawas nga petsa an gobyerno kun san-o an ikaduha nga panhatag hini nga ayuda pinansyal. # (KEVIN SIOSANA)