Isumat.com/7:27AM, Abril 22, 2021
Nasikmit han mga tinubyanan han balaud an usa nga retirado nga miembro han Philippine National Police dida han gindumara nga operasyon ha Brgy Tabu, Dulag Leyte, Abril 21, 2021.
Ginkilala an suspetsado nga hi Edgar Omawas Bautista, 59 anyos, inasaw-an, nag-uukoy ha Brgy Highway han nasabi nga bungto ngan hiya in retirado nga PNP member. Subay han impormasyon, hi Bautista in numero 4 ha watchlist han PDEA-Region 8 ngan Leyte PNP Provincial Office.
Sumala han report, nag pruweba pag-eskapo hi Bautista samtang gin-i-imbentaryo an mga nakuha nga ebedensya tikang ha iya. Pero dida han iya pagkarida, napakulob hiya ngan nagkapapang-gusan an wala nga parte han iya nawong. Waray magmalinangpuson an iya pagmala-ikyas.
Mahugot naman nga igindiwara han suspetsado nga nagmamala-eskapo hiya kay sumala ha iya waray man niya kasaypanan, sanglit deri hiya madalagan.
Ginhimo an anti-illegal drugs operation pasado alas 6 han gab-i kun diin syahan nga nakuha tikang han suspetsado in usa ka sachet hin gin-aalegar nga shabu. Dida han pagkapkapi ha iya, nakumpiskar in kadugangan nga 13 ka sachet hin gintotoohan nga droga.
Narekupo gihapon tikang han suspetsado an kwarta nga gingamit han operasyon sugad man an sarakyan nga Mitsubishi Adventure. Hi Bautista ug an mga ebedensya in igintubyan ha PDEA para han kaangayan nga dokumentasyon, disposisyon ngan pagsampa han kaso.
An mga operatiba han Dulag PNP, Leyte PNP ngan PDEA an nagburublig dida han mao nga operasyon kun diin nagin saksi gihapon an kapitan han barangay, tinaglawas han Department of Justice ngan kaapi han media. # (with additional report from Gil Aniceto Tamayo)
