Isumat.com/8:23AM, Abril 20, 2021
Nasikop han mga otoridad in duha nga kalalakin-an nga suspetsado pagpinangawat hin motorsiklo sugad man nakumpiskar gihapon in maabot usa ka dosena han ira nakawat nga motorsiklo.
Ginkilala an mga suspetsado nga hira alias Rhico, 30 anyos, security guard; ug an iya kaupod nga hi alias Philip, 24 anyos nga barbero. Hira ngaduha in residente han Babatngon, Leyte.
Ha report han Tacloban City PNP, nadakop an mga suspetsado katapos hin pira ka adlaw nga pagtiktik han ira mga aktibidadis. Ginmonitor gihapon han kapulisan an mga junkshop nga posible pagbaligyaan han mga parte hin motorsiklo.
Kun manunumduman, kadam-an nga motorsiklo an kinawat ha Tacloban han nag-agi nga pira ka bulan. Hadin Abril 17, usa nga 53-anyos nga lalaki an nagreklamo ha Tacloban PNP kay nabiktima gihapon hiya han pangawat hin motor.
An mga otoridad in nakasipat han motorsiklo han mao nga tagreklamo ha usa nga repair shop ha Brgy 74, Nulatula. Kadagmitan iginkasa an operasyon ngan na-aktuhan nga ginmamanaho-an han mga suspetsado an kinawat nga motorsiklo.
Han pag-imbestigar han kapulisan, waray na nahimo an duha nga suspetsado ngan ira gin-angkon nga raket nira an pangawat ngan pagbaligya hin motorsiklo. Tungod hini, nakumpiskar han mga tinubyanan han balaud in 12 nga motorsiklo tikang han mga gintatahapan.
Kasumpay hini, an Tacloban City Police in nananawagan ha mga tag-iya hin kinawat nga motorsiko nga makig-koordinasyon ha ira basi mahibalik an ira motorsiklo ngan masalawdan han kaangayan nga mga kaso an mga suspetsado. #
