Isumat.com/11:01AM, April 29,2020
Nakatalaan masabtan buwas (Abril 30) o Biernes (Mayo 1) an resulta han Batch 13 han swab samples tikang denhi ha Eastern Visayas nga iginpadara kakulop ngadto ha Cebu para han confirmatory testing. Ginkokomponer hin 115 samples an nasabi nga batch.
Dida han pahayag han DOH-Region 8, ini nga samples in ginkuha tikang ha mga close contacts han naha-una nga mga Confirmed Cases, sugad man tikang hin mga Suspected Cases ha magkalainlain nga lugar han rehiyon.
Ini nga batch an iginpadara kakulop pinaagi han Philippine Navy ug igpapailarum han test didto ha Vicente Sotto Memorial Medical Center. Paghagos hin porlomenos 48 oras tikang han pag-eksamin ha laboratoryo, igpapagawas na an resulta hini.
Amo ini nga batch an ikaduha han pinakadamo nga samples nga iginpadara ha Cebu. Hadin Lunes umabot an resulta han Batch 12 (132 samples) nga amo an gidadamu-i nga swab batch kun diin 6 ka tawo an nag positibo han corona virus.
Ha bug-os nga rehiyon otso, 13 na ka tawo an kumpirmado nga natapnan han virus. Usa ha Catarman, usa ha Calbayog, duha ha Burauen ngan siyam ha Tarangnan, Samar.
Dida han report han DOH tobtob han Abril 28, an suspected cases in naabot pa hin 209 ka tawo. Naka-admit ha magkalainlain nga hospital an 44, samtang aada naman ha home isolation an 165 nga suspected cases. #
