Isumat.com/Nobyembre 30, 2021
Nasamad in usa nga pulis ngan usa nga sundalo dida hin magkalain nga asdangay kontra han kumunista nga New Peoples’ Army ha Northern Samar.
Hadin Sabado, Nobyembre 27, 2021, an PNP-Special Action Force an iginkasurapo han mga terorista nga rebelde samtang nagpapatrolya ha Brgy Magsaysay, Mapanas,Northern Samar.
Ginkilala an samaran nga hi Patrolman Ben Liwen Saclangan nga nadara ha hospital ngan gintatambal hapagkayana. Waray matudlok kun pira an casualty ha panig han mga rebelde.
Samtang, kakulop, Nobyembre 29, 2021, nagkaada gihapon hin balyu-ay hin bala ha butnga han Philippine Army ngan NPA ha Las Navas, Northern Samar.
An mga sundalo in nagdudumara hin Community Support Service han pagsulungon han mga rebelde.
Nasamad hi PFC Darell Besanes nga kadagmitan gindara ha Catarman Doctors Hospital ngan talwas na yana an kabutangan.
Nahitabo ini nga engkwentro pasado alas 10 han aga kun diin tigda la nga gin-atake han mga rebelde an mga tropa han gobyerno nga naghihimo han mga aktibidadis dida hin tulo nga barangay ha Las Navas.
Subay han report, an grupo han mga rebelde in ginpangunahan ni Kumander Gimo nga amo an responsable pagsunog hin construction equipment ngan pagpatay hin usa nga barangay kapitan ha Las Navas hadin Hulyo 2021.
Kun manunumduman, sobra pala usa ka semana an nakalabay han pag-ambuson han mga NPA an mga PNP-SAF Troopers ha Gamay, Northern Samar kun diin duha nga kapulisan an namatay.
Dida hini nga insidente, an mga kumunista nga rebelde in gumamit pa hin mga landmines nga bomba nga mahugot igindederi ha mga aragway.
Iginsaad naman han liderato han PNP nga magbabaton ha balaud an mga grupo han rebelde nga nagbuhat hini nga patraydor nga mga pagsulong. #
