Nakatalaan nga umabot ha rehiyon otso an porlominos 200 nga mga Overseas Filipino Workers (OFW) nga tikang ha magkalainlain nga nasud upod na an mga nag tratrabaho ha mga barko nga na apektuhan han Covid 2019 Virus Pandemic.
Ini an gin sumat ni Overseas Workers and Welfare Administration (OWWA) Regional Director Sergio Borgueta Jr. ha interview han isumat.com.
Sumala kan Director Borgueta nga ira nala gin huhulat an kumpleto nga lista han mga OFW ngan kon san-o gud an eksakto nga adlaw han ira pag abot ha siyudad han Tacloban.
An mao nga mga OFW in human na nga gin pailarom han 14 days mandatory quarantine tikang han ira pag abot ha Manila ngan nag negatibo han gin dumara nga rapid test han gobyerno hinungdan nga pwede na hira maka uli haira tagsa-tagsa nga mga pamilya.
Tatapoon han OWWA ngan han mga opisyal han Maritime Industry Authority (MARINA) ngan han Philippine Coastguard an mao nga mga OFW’s haira pag abot ha Manila ngan diretso ini nga dadad-on ngadto han ira tagsa tagsa nga bungto sumala kan Borgueta.
Ipapailarom gihapon ha mandatory 14 days quarantine an mga OFW’s ngan hira in ibubutang han mga isolation/quarantine facilities han kada munisipyo ngan deri haira mga panimalay sumala pa kan Borgueta.
Kon karuyag han mga local government nga igpa ilarom ini hira hin rapid testing ini in pag bubuhaton pero LGU na an magastos.
