Nadiskarel an plano han mga rebelde nga New Peoples Army nga magdumara hin ambush kontra han mga tropa han gobyerno ha lugar nga nasasakop han Brgy Hubasan, Calbiga, Samar hadton Abril 6, 2020.
Dida han impormasyon nga iginpagawas han 8th Infantry Division-Philippine Army ngan Philippine Information Agency-8, hinsabutan nga nagtanum na hin mga landmine o bomba nga iginlulubong ha tuna an mga rebelde nga komunista dida han dalan nga amo la an nagseserbe nga aragi-an tikang ha Brgy Hubasan tikadto ha Brgy Binangaran han nasabi nga bungto.
Nagpahayag an militar nga nakakarawat hira hin impormasyon tikang hin usa nga sibilyan kasumpay han maraot nga plano han mga rebelde, sanglit kadagmitan ginpanginano nira ini ngan nadiskubrehan an nahita-od na nga mga Improvised Explosive Devices (IED). Malinangpuson nga nakuha ini han militar tikang dida han ginbutangan hini.
Nagpasalamat an mga residente han nasabi nga lugar han kadagmitan nga aksyon han militar kay an nasabi nga mga bomba in magdudurot hin peligro ha ira mismo sugad man ha mga tropa han gobyerno.
An mga kaapi han 46th Infantry Batallion ha panguna ni Lt. Col. Rhomel Langcauon amo an naningkamot nga matanggal an nasabi nga mga bomba. Kasumpay hini, hul-os nga nagpasalamat hi Langcauon ha mga sibilyan nga naghatag han impormasyon ha militar. Sering pa ha opisyal, kun deri han bulig han sibiliyan, nabubutang gud ha kadelikaduhan an ira mga tropa ug an mga residente.
Mahugot nga ginkondenar ni 8th ID chief, Major General Pio Dinoso ini nga binuhatan han mga rebelde. Sumala kan Dinoso, deri kanan tawo ini nga gi-os han mga kumunista labi na yana nga nag deklarar an gobyerno hin unilateral ceasefire ug sagipo hin duro an mga tropa han gobyerno ha mga aktibidadis basi makabulig han krisis nga gin-aatubang han nasud tungod han COVID-19.
Nagpahayag pa an militar nga ira igpapadayon an ira pagpanalipod han mga sibilyan kontra han mga magraot nga plano han mga rebelde. Gin-utro nira an panawagan ha publiko nga makigbinuligay ha gobyerno ha pagsupil han tanan nga klase hin terorismo. #
(Posted 2:23 PM, April 8, 2020)
