Kulang hin edukasyon, kulang hin simpatiya, kulang hin matadong nga pagtirutimbang ngan posible mga hambugon ngan napakama-aram…usahay ini nga mga rason an nagigin hinungdan hin pagpagawas hin mga komentaryo labi na ha social media sugad han faceboook nga waray igindudurot nga kaupayan ha igkasi tawo.
Dida han naglabay nga pira ka adlaw, nagtitikapaso na an palabay-labay hin mga pulong tikang han mga katawhan dida han facebook page han 99.1 iFM-RMN Tacloban. Ini nga FB Account han radio station in yinukot-yukot an followers ha bug-os nga kalibutan nga nagpapamulat han gibabag-uhi nga mga updates tikang ha aton rehiyon. An rason han lantugi amo ini: may mga nitizens nga naderi nga ig-confine ha Eastern Visayas Regional Medical Center ha Tacloban an mga tawo ha iba nga parte han Sinirangan Visayas nga nagpo positibo han COVID-19?
Pira nga mga nitizens an nagpabati hin pagtipa nga ig-confine ha EVRMC an mga corona virus positive nga mga tawo labi na kun tikang ha Samar. Kun aton manunumduman, tanan han upat nga nag positibo in tikang ha Samar; usa an taga Catarman N. Samar, usa an tikang ha Calbayog City, ngan duha an tikang ha Tarangnan, Samar.
Sumala han iba nga nitizens nga deri na unta dad-on nganhi ha Tacloban kay bangin pa ini makatapon, dapat daw didto na la ha mga hospital ha Samar pagtambalon ini nga mga pasyente.
May nitizen nga nagpabati nga kawang la an paningkamot denhi ha Leyte nga waray maalakbatan han kagaw kun pasusudlon ha Tacloban ini nga mga corona virus positive.
Ginbaton liwat ini hin pira nga nitizens nga kinahanglan intindihon naton nga an EVRMC amo la an nag-uusaan nga hospital ha aton rehiyon nga may kapas ngan ekipahes pagkapot hin sugad hini nga mga kaso. Ngan amo ngani nga tinatawag ini nga “Regional Medical Center” kay para ini han ngatanan nga tawo han Eastern Visayas. An EVRMC amo gihapon an nag-uusaan la nga hospital ha Region 8 nga gintagan hin otoridad han DOH nga magkapot han mga kaso han COVID-19.
Pira naman nga mga nitizens an naghangyo nga deri dapat mangirhat kita kun dadad-on ini nga mga may sakit ha EVRMC kay mayda man ginsusunod nga mga pitad basi maseguro nga deri ini makakatapon ha iba. Dapat ngani, ihatag naton an aton simpatiya ngan kalooy para hini nga mga magsakit kay waray man nira hini kasaypanan, ugaring la kay natapnan hira.
Sering pa hin usa nga nag komentaryo, kun didto ha Samar nahimumutang an EVRMC ngan an may sakit in taga-Leyte, ano man an imo aabaton kun deri sumugot an mga taga Samar nga dad-on ngadto an may sakit?
Ini nga palabay-labay hin mga pulong ha social media in klaro nga ladawan han hababaw nga pakasantop hin damo nga katawhan hiton tinood nga sitwasyon. Amo ini it klaro nga representasyon denhi ha Pilipinas. Minilyon-milyon nga Pilipino an nagpapabati hin komentaryo bisan an tumanay la it impormasyon nga nababaru-an. Ug an makuri pa hini, damo nga Pinoy an nagpapatamak han ira mga rason ha peke nga impormasyon.
Grabe ini nga krisis nga ginpapas-an yana han kalibutan ug han Pilipinas, ug ini nga mga klase hin panhuna-huna hin kadam-an nga Pinoy an mas nagpapakuri pa hit sitwasyon. #
(Posted 9:55 AM, April 8, 2020)
Note: An tagsurat hini nga artikulo in tim-os nga nagpapasalamat han mga nitizens nga nakaka-intindi kun kay-ano nga gindadara ha EVRMC an mga COVID-19 positive.
