Ha pagtigaman han Fire Prevention Month ha bulan hiton Marso, padayon nga naatubang hin dako nga kakulangan an Bureau of Fire Protection-Region 8 ha ira mandato pagsurapo han mga insidente hin sunog. Ini in dara kay 23 pa nga munisipalidad ha Sinirangan Bisayas in nagpapabilin nga waray fire stations, sanglit waray liwat fire trucks.

An iba nga bungto, mayda fire station pero kulang liwat hin personales. Iginbuyagyag ni BFP Region 8 Director Senior Supt. Renato Marcial nga an Samar an nagunguna ha listahan han mga lalawigan kun diin damo an bungto nga waray fire stations. Ini nga mga municipalidad ha Samar amo an Almagro, Daram, San Jose de Buan, Sto Nino, Tagapul-an, Talalora ngan Zumarraga.

Didto naman ha Northern Samar, an Biri, Bobon, Lapinig, Rosario, San Vicente ngan Victoria an waray estasyon, samtang ha Eastern Samar aada an mga bungto han LLorente, Maydolong, Mercedes ngan San Julian. Ha Biliran Province, an bungto nala han Maripipi an waray facilidad, samtang ha Southern Leyte amo an Anahawan, Padre Burgos ngan Pintuyan. Ha probinsya han Leyte, waray fire station an MacArthur, samtang ha La Paz, mayda estasyon pero waray naman firetruck.

Nag-esplikar hi Marcial nga ginhihimo nira an paningkamot basi magkamay-ada na tanan hin fire stations pero diri daw sugad la hini kamasayon kay damo pa an rekisitos nga kinahanglan antis ini aprubaran han BFP-Central Office. Usa na hini nga an Local Government Unit in mayda natudlok nga lote porlomenos 400 square meters an kahaluag nga tutukuran han estasyon ngan kinahanglan aprubado han Mines and Geosciences Bureau an lokasyon han lote.

Ha pagka yana, an mga municipalidad nga waray pa fire stations in may gintu-inan nga fire safety officer nga nagdudumara han inspeksyon ha mga establisemento, ngan mayda liwat mga grupo hin volunteers nga amo an mabaton ha takna hin sunog, pahayag pa han opisyal. An gobyerno nasyunal in nag-alutaga hin 10 bilyones pesos nga pondo basi magka-ada hin kumpleto nga mga gamit ngan personales an kada LGU ha bug-os nga Pilipinas para hini nga panuyu-anan. #