Isumat.com/7:25AM, June 7, 2020
Ginpakurukusog pa han Philippine Army an ira pwersa ha probinsya han Eastern Samar. Ini in pinaagi hin duha ka batalyon hin kasundaluhan nga igindugang ngadto han lalawigan.
Hi Major General Pio Dinoso, Commander han 8th Infantry Division han Philippine Army, in nagsumat nga an 52nd Infantry Battalion an gin-deploy ha Buray-Taft Area samtang iginbutang naman harani ha Borongan City an 78th Infantry Battalion.
Sumala kan Dinoso, in inga kadugangan nga tropa han military in agud makabulig han kampanya kontra han insureksyon ha Eastern Samar.
Kun aton manunumduman, ugsa matapos an 2019 ngan temprano pa yana nga tuig, pira nga panhitabo hin pang-gama ngan enkwentro an natabo ha tay-aw nga mga lugar ha Borongan City.
Ha luyo naman nga bahin, an mga Sangguniang Bayan han Basey ngan Marabut ha Samar Province in nagpasa hin mga resolusyon nagdedeklarar nga persona-non-grata an mga rebelde nga NPA ha ira mga munisipalidad.
Iginpahayag han nasabi nga mga resulusyon nga sarado an portahan han ira mga bungto ngan deri ginkakarawat an walhon nga kagi-usan.
Ha atubangan hini nga mga pitad kontra han mga rebelde, iginpapadayon naman han gobyerno an panawagan han aton mga kabugtu-an ha bukid nga bumalik na ha piyod han balaud.
An gobyerno an naglunsad han Enhanced Comprehensive Local Integration Program (E-CLIP) ha panuyo nga mabuligan an mga masurender nga karuyag makabalik ha ira mga lugar ngan igka-urusa utro han ira pamilya.
Pinaagi hini nga programa, an mga masurender nga rebelde in tatagan hin paghag-id, ayuda pinansyal ngan pagtutdo hin pakabuhi para han mamurayaw nga ira pag-ukoy upod han katilingban. # (KEVIN SIOSANA)
