Catbalogan City– Ha pinakusog nga kampanya kontra han illegal drugs deri la mga ordinaryo nga mga suspected drug pusher iton nag kaka dadakop yana hiton mga otoridad.
Usa nga ahente han Philippine Drug Enforecement Agency (PDEA) in nadakop ha usa nga operation ngan nakilala kan Jonathan O. Mabesa aka Pewee ngan Jaime, 40 years old, may asawa usa anay nga sundalo ngan yana in empleyado han PDEA han region-8 .
Sumala han impormasyon nga nahikay han isumat.com nakuha kan Mabesa ha guin dumara nga buy-bust operation in 1 ka sachet hin suspected “shabu” , 1 Caliber 22 nga pusil ngan mga bala ngan 500-peso bill nga may serial Number NP392304.
Nakuha liwat ha panimalay han suspect ipinaagi hin usa nga search warrant nga guin palusad ni Judge Janet Cabalona han Calbiga RTC an mga masunod: usa nga caliber 38 nga pusil, usa nga Caliber 22 Magnum pistol, 2 Cellular Phones, improvised pipe, 2 nga lighters, 6 ka sachets nga guin tutuohan nga guin sudlan hin shabu , aluminium foils, 5 ka sachets hin guin tutuohan nga “shabu”, weighing scale, usa nga improvised sealer, gunting ngan plastic nga guin sudlan hin marijuana ngan 200 pesos nga kuarta.
Sumala han Catbalogan Police nga an suspetsado
in usa nga kilala nga drug personality haira lugar.
Guin dumara an buy-bust operation ngan an pag search han panimalay han suspetsado hadton byernes han kulop ha barangay canlapwas Catbalogan City ha pinag usa nga pwersa han mga elemento han Catbalogan PNP, CIDG, ngan PDEA.
