Isumat.com/9:33AM, May 8, 2020
Sakay na Maam/Sir…..tagpira man an pasahe han tricycle? Tag 18 pesos na kada tawo. Ha??? Tinood ba ???
Posible nga amo ini an matatabo kun tugutan an hangyo han MotorCab for Hire (MCH) Drivers Association nga umentuhan hin 9 pesos an pamasahe yana. An grupo in nananawagan ha Konseho han syudad nga magkaada hin temporaryo nga umento ha pamasahe.
Sumala kan Joseph Tangile, presidente han asosasyon, ini nga ira hangyo in iginpadangat na ha Konseho pinaagi hin usa nga petisyon kun diin nahipapatik nga magin 18 pesos na an pasahe tikang ha 9 pesos.
Iginrason han grupo nga napipi-angan an ira pakabuhi kay imbes nga puede hira magpasakay hin tulo o upat ka tawo, tag-usa nala nga pasahero an igintutugot yana ha MCH dara na gihapon han pagpasunod han social distancing tungod han COVID-19. Hinungdan hini, duro na daw nga lugi an ira kuhida ngan deri na makakasapar han panginahanglan han ira tagsatagsa nga pamilya.
Ginklaro naman ni Tangile nga an ira pagpa-umento in yana la nga aada kita ha krisis, ngan kun bumalik na ha normal an kahimtang, igbabalik gihapon an 9 pesos nga pasahe.
An mga MCH drivers han Tacloban nga nakagrehistro han ira operasyon para han tuig 2020 in kumarawat hin tag 1500 pesos nga ayuda han City Government komo hinabang hini nga krisis nga gin-aantos yana.
Ano man sangkay? kun aprobaran ini….masakay ka o magbabaktas nala? # (KEVIN SIOSANA)
