Isumat.com/Setyembre 13, 2023
Waray kamatuoran an nagsarang nga notisya nga iginpapaaresto han Southern Leyte Sanguniang Panlalawigan hi Eduardo Santos, an District Engineer han DPWH-Southern Leyte Sub-District Engineering Office.
Hi Santos in nagpahayag nga tobtob yana, waray mga dokumento o kamanduan hin bisan ano nga korte o hukmanan nga arestuhon hiya. Ha iya gihapon pagsabot, waray pormal nga reklamo nga iginsampa kontra ha iya ngan waray imbestigasyon ha iya.
Tungod hini, nagugupong hi Santos kun kay-ano nagkagawas ha on-line news nga an Sanguniang Panlalawigan han Southern Leyte in nagkaada hin resolusyon nga arestuhon hiya.
Kun manunumduman, hadton Agosto 17, 2023 an The Manila Times on line news in nagpublikar hin balita nga may titulo nga “Arrest of DPWH Exec in Leyte Sought.” Dida han nasabi nga artikulo, nagmamalatumat ini nga an resolosyon han SP in nagmamando nga arestuhon hi Santos kay deri daw hiya na-atender han sesyon kun diin pira na ka beses nga ginkumbida hiya han konseho basi mag-eplikar hin mga isyu nga nagdadabi han road clearing operations.
Nagsumat hi Santos nga dida han sesyon han SP hadton Agosto 29, nagsering an konseho ha iya nga waray resolusyon nga arestuhon hiya.
Kasumpay hini, igindig-on ni Santos nga waray kamatuoran an balita nga iginpapadakop hiya. Iya gihapon iginbuyagyag nga waray niya gin-aatubang nga kaso kriminal.
Kasumpay hini, an opisyal in nagpatapod nga kun mayda man mga kamanduan han korte, hiya in hul-os nga makooperar.
Iya gihapon iginpasarig nga igpapadayon an iya matadong nga ginawi-an komo usa nga nagseserbe ha publiko. #
