Isumat.com/Hunyo 14, 2023
Utro nga iginduso han mga lideres han Singbahan Katoliko ha isla han Samar nga magkaada hin kalugaringon nga Samar Island Region ug ini in mabulag ha Eastern Visayas (Region 8).
Dida han hiruhimangraw han mga kaapi han Samar Island Partnership for Peace and Developmet ha Borongan City, igindig-on ni Obispo Crispin Varquez nga an pagtindog hin Samar Island Region an susi para han kauswagan han mga probinsya han Samar, Eastern Samar ngan Northern Samar.
Kun manumumduman, hadton 2016, hi Varquez upod kanda Calbayog Bishop Isabelo Abarquez ngan Catarman Bishop Emmanuel Trance an nagproponer para hini nga bag-o nga rehiyon.
Han 2015, hi anay Pangulo Noynoy Aquino in nagpirma hin kamanduan pagtukod han Negros Island Region ngan amo ini an nagin dalan para manawagan an nasabi nga mga obispo nga magproponer hin pagkaada gihapon hin Samar Island Region.
Pero paglingkod ni anay Presidente Rodrigo Duterte, iya iginbasura an kamanduan ni Aquino kay deri akos han pondo han gobyerno an pagkaada hin kadugangan nga rehiyon, sanglit waray ini madayon nga Negros Island Region.
Ha atubangan hini, hi Bishop Varquez in naglalaum nga may tsansa basi maglugaring nga bulag nga rehiyon an isla han Samar. Sering pa han obispo, an Samar in rikuhanon ha natural nga bahandi nga makakapadukwag han kinabuhi han mga mulopyo pero ini in nawawarayan pulos tungod han problema han insurhensiya, kulang nga serbisyo ngan peligro tikang ha mga kalamidad.
Kun maglugaring ini komo usa nga rehiyon, matututukan han mga opisyal an mga problema ngan magagahinan hin bastante nga pondo an rehiyon tikang ha gobyerno national.#
