Isumat.com/Hunyo 15, 2023
May mga tawo an natood nga dimalas an numero 13 labi na kun iginkakatuman nga adlaw han Biernes, pero bisan deri Biernes, sugadsugad nga nagdurot ini nga numero hin kadimalasan kay dida han Martes, Hunyo 13, 2023, unom ka tawo an naawat an kinabuhi ha magkalainlain nga aksidente ha Rehiyon Otso.
Namatay an duha nga kalalakin-an han ma-aksidente an ira sinasakyan nga motorsiklo alas 3:45 han maagahon, Hunyo 13, ha Maharllika Highway, Brgy Punta, San Francisco, Southern Leyte.
Ginkilala an mga biktima nga hira Rodulfo Abarico, drayber han motrsiklo, 22 anyos, ulitawo, estudyante ngan residente han nasabi nga bungto; ug an iya angkas nga hi Noel Madera, grade 9 student, residente gihapon han San Francisco.
Ha imbestigasyon, hinsabutan nga naka-inom hin makahurubog nga irimnon an drayber han motorsiklo ngan pagliko nira dida han kalsada, nawarayawan kontrol ha manibela ngan sumemplang an motorsiklo ngadto hin konkreto nga pader.
An mga biktima in namatay ha hospital samtang gintatambal.
Hadto gihapon nga adlaw, pasado alas 9 han aga, namatay hi Florencia Olemberio, 63 anyos, taga Brgy Canmucat, Villareal, Samar han matudol hiya hin motorsiklo nga ginmamanehoan han suspetsado nga hi Ernesto Varela, 23 anyos, residente han mao nga bungto.
Hi Varela nga nagbibiyahe tikang ha Calbiga tikadto ha Villareal an aksidente nga nakatudol han biktima ha kalsada ha Sitio Lusong, Brgy Canmucat. Dead on arrival ha hospital an biktima samtang an suspetsado in ginkustudiya han kapulisan para han kaangayan nga disposisyon.
Pagka alas 2:10 han kulop, aksidente nga nabanggaan hin Mini Dump truck an usa nga motorsiklo ha Brgy Bagumbayan, Hilongos, Leyte nagresulta han kamatay hin duha katawo.
Ginkilala an mga biktima nga hira Antonio Garao, 32 anyos, drayber han motorsiklo ug an 5-anyos nga iya anak Carl Gian Garao. An drayber han dump truck in ginkilala nga hi Angelo Doguilles, 25 anyos, taga Brgy Lamak han mao nga bungto.
An motorsiklo nga sinasakyan han magtala-amay nga Garao in kumabat ha kaluyo nga lane han kalsada han ira pagkurbada, ngan iginkasampakay han iginkakatapo nga dumptruck. Tungod han pwersa han banggaay, nanhilabog ha motorsiklo an mga biktima nga nag-antos hin gulpi nga injuries hinungdan han kaanaw han ira kinabuhi.
An drayber han truck in temporaryo ginkustudiya ha Hilongos PNP Office para han kaangayan nga disposisyon.
Didto naman ha Brgy Balocawe, Abuyog, Leyte, usa nga Nissan Navarra SUV an aksidente nga nakatudol hin lalaki nga natabok han kalsada rason han iya kamatay.
Aalas 9:25 han gab-i han matabo an insidente ha national highway ha mao nga barangay.
Ginkilala an biktima nga hi Eduardo Arceo, residente han Brgy Barayong han nasabi nga bungto; samtang an suspetsado hi Larry Pepito Guarino, 55 anyos, nag-uukoy ha Regina Hills, Brgy 74, Tacloban City.
Iginpapakita ha inisyal nga imbestigasyon nga an behikulo nga ginmamanehoan ni Guarino in tikadto ha Maasin City tikang ha Tacloban City. Nabanggaan han behikulo an biktima nga nagbabaktas ha butnga han kalsada.
Dead on arrival an biktima han pagdad-on ha Abuyog District Hospital, samtang an Abuyog PNP an nagkustudiya kan Guarino ug an behikulo nga nadabi han insidente. #
