Isumat.com/6:17AM, December 1, 2020
Nagtitikapaso an isyu kasumpay han operasyon hin Blacksand Mining ha MacArthur, Leyte.
Dida han Nobyembre 29, nagdumara hin rally in porlomenos 30 nga mga magtatrabaho han minehan ha atubangan han Singbahan Katoliko didto han bungto kun diin an Kura Paroko nga hi Fr. Amadeo Alvero an nagunguna han grupo nga natipa han pagmina.
Igindig-on han mga raliyesta nga an pagmina amo an nakakabuhi han ira pamilya ngan waray kadelikaduhan nga igdudurot hini.
Hi Alvero in nakigsumpayan ngadto han mga minero basi niya igka-istorya an ira lider ngan mahimangrawan hin hul-os an isyu. Pero waray dayalogo nga natabo kay subay han impormasyon, lumakat an lider ngan ginbayaan an mga nagra-rally.
Dida han interview han iFM-RMN Tacloban kan Alvero, nagsering hiya nga mayda katatapuran nga mga surok an nagsumat ha iya nga mismo hi MacArthur Mayor Ruben Babante an nag-aghat han mga minero nga magdumara hin gi-os basi makasabot an padi nga karuyag nira magpadayon an pagmina.
Igindugang pa ni Alvero nga mayda liwat nag-istorya ha iya nga may mga opisyal han minahan an nagmando han pagrally ngan obligado an ngatanan nga nagtatatrabaho nga tumambong han aktibidad. Pero han maagahon hadto nga adlaw, deri na daw “mandatory” an kamanduan ngan boluntaryo na la sanglit deri na gud damo an nag-rally ha atubangan han singbahan.
Gintagan hin duon ni Alvero nga mayda niya emisaryo nga ginpakadto han grupo han mga minero kay basi makagtudlok hin petsa para hin hapsay ngan mamurayaw nga hiruhimangraw tungod hini nga kahimtang.
Dida han iya pahayag ha social media, iginlatag ni Alvero an mga rasones kun kay-ano nga natipa hiya han pagmina: Syahan, ini nga lugar han pagmina in Prime Agricultural Land ngan igindederi han balaud an pagmina ha mga umhanan kay amo ini an ginkukuhaan hin produkto hin pagkaon ngan kun maguba ini, deri na pagpupulsan ha dayuday nga panahon.
Ikaduha nga rason amo an peligro han pagbabaha nga posible magin rsulta hini; Ikatulo amo an pagpasibaya ngan waray rehabilitasyon ha mga lugar han bungto nga ginminahan na hadto ngan deri na nagagamitan yana; ngan ikalima, dako an posibilidad nga surok hin pangurakot ini nga pagmina kay bangin nabubusog hin salapi an bulsa hin mga opisyal han bungto.
Ginklaro ni Alvero nga iya ginrerespeto an katungod han katawhan nga magpakabuhi ngan kumarawat hin sweldo. Pero ini in waray pulos kay temporaryo la ngan maguguba pa gud an kalibungan.
Ginpananglitan pa ni Alvero an mga kahagnaan ha Brgy Pongon, San Pedro ngan Tuyo nga ginminahan hadto pero waray rehabilitasyon sanglit warat na gamit yana.
Han una nga semana, hi Mayor Babante in nanhimuwa han mga akusasyon han padi. Sumala han alkalde, deri ini tinood kay waray pa man magtikang an operasyon han pagmina ngan ginseguro han Mining Company an rehabilitasyon han ma-aapektaran nga mga lugar. #
