Isumat.com/7:01AM, December 2, 2020
Makabibido nga mga panhitabo an sumugat ha pira nga bungto ha Eastern Samar ha pag-abri han bulan han Disyembre.
Usa nga babayehay an namatay han malunod an ginsasakyan nga motorboat ngan pira nga bungto han probinsya an ginbabaha tungod han pagpusdak hin maiha ngan makusog nga uran kakulop, Disyembre 1, 2020.
Sumala han impormasyon tikang ha Eastern Samar Philippine Coast Guard, an 3-anyos nga babayehay in nalumos han matiklob an motorboat nga iya sinasakyan tikang ha isla han Divinubo nga tikadto unta ha Brgy Lalawigan, Borongan City.
Han pasado alas 3 han kulop, natiklob an sarakyan han pagtampaluhon hin dagko nga balud. Nakasalbar an lima nga pasaheros ngan tulo nga tripulante han sarakyan pero nalumos an bata. Nadara pa hiya ha hospital pero gindeklarar nga dead on arrival.
Mayda naman mga parte han mga bungto han Oras ngan Jipapad an ginbabaha. Lakip denhi an mga barangay ha sulod ngan gawas han poblacion.
Waray gihapon kaagi-i an national highway ha San Policarpo-Jipapad section tungod han baha. Ha luyo nga bahin, an LGU-Dolores in nagdesisyon nga kanselaron an pag-opisina kakulop tungod han maraot nga tiempo.
An makusog nga uran ngan maraot nga panahon in durot han Low Pressure Area nga hapagkayana, Disyembre 2, in harani-ay na ha Samar-Bicol Area. #
