Ha pagtigaman han adlaw han kasingkasing, igin papa-angbit liwat han mga kaapi han Islands of Samar and Leyte Artists (ISLA) an ira gugma ha kultura pinaagi han pagdumara han 2nd Pa-Ugat Culture and Arts Festival. In nga pasundayag han magkalainlain nga porma han arts and culture in gin-abrihan dida han Pebrero 14 ug mahagos tobtob Pebrero 21 ha Plaza Rizal, Tacloban City.
An walo ka adlaw nga aktibidad in pangungunahan han mga miembro han ISLSA nga maghihimo hin mga pagtutdo ngan exhibit upod na gihapon an mga banggiitan nga artists tikang ha iba nga parte han nasud. In nga ira buruhaton in kaparte han pagsalin-urog han National Arts Months yana nga bulan.
Dida han syahan nga adlaw, nagkamay-ada hin painting workshop para han mga kabataan, sugad man body painting, ngan artists talk kun diin nagkamay-ada hin lecture an mga nagunguna nga magturutdo han culture and arts denhi ha aton dapit sugad kanda Merlie Alunan, Riza Makabenta, Jen Garcia ngan Marlon Moscare.
Pagka Sabado, Pebrero 15, bubuhaton naman an Print Making ngan Art workshop ni Florence Cinco, susundan ini han mga workshop parte naman han skultura, photography, musika ngan mga sayaw tobtob han ira closing ceremonies hiton Pebrero 21.
Labot la han mga workshop, mayda gihapon mga pasundayag kada gab-i kun diin masalida an mga kilalado nga local bands sugad han Banda Bahal, Campo Xanto, Debosyon, Green Peace ngan Kendel& Friends. Makikit-an liwat an mga dance groups sugad han Step Up, Caloy Dance Troup, LNHS Flash, Colove ngan Jive Dancers ngan kadam-an pa nga iba.
Ini in libre para han publiko ngan gin-aaghat han ISLA an mayda mga talento dida hini nga larangan han culture and arts nga makigsumpayan ha ira basi makabulig hira ha pagpa-uswag han mga abilidad labi na han mga batan-on. #
