Isumat.com/1:23PM, August 28, 2020
Nagpapabilin nga aada ha “Lockdown” an Ormoc City PNP Office sugad man an Ormoc PNP Station 2 basi kabalabgan nga magsarang an Covid-19 katapos la nga magpositibo han kagaw an usa nga pulis.
Dida han impormasyon nga nahikay han Isumat.com, an kapulisan nga nakadestino dida hini nga mga estasyon in iginpa-ilarum na hin Isolation ngan ginkuhaan hin swab samples. Ginlalauman nga dida hiton Sabado o Domingo magawas na an resulta han laboratory test.
Hadin Agosto 26, nagreport an DOH nga mayda 11 nga bag-o nga kaso ha Ormoc. Lima ha ira an mga LSI tikang ha Cebu, samtang an unom mga Frontliners ngan Direct Contacs han nagpositibo nga pulis.
Hapagkayana, iginpapadayon pa an contact tracing basi matudlok an mga tawo nga iginka-urusa han bag-o nga nagkatatapnan.
Kasumpay hini, ginseguro naman han Ormoc PNP nga deri paralisado an ira serbisyo publiko kay puede man matawagan ha telepono an ira opisina kun may mga panginahanglan. Nagpadara na gihapon hin kadugangan nga pwersa an PNP Special Action Force sugad man na-ayuda gihapon an mga tropa han Philippine Army.
Igindugang pa han report nga deri sakop han lockdown an Station 1 ngan Station 3 han Ormoc City PNP.
An Ormoc in nagkaada na hin 111 nga nagpositibo han Covid-19 kun diin 82 na an nakatalwas. Hapagkayana, 28 an Active Cases ngan usa na an namatay.
