Isumat.com/9:56AM,May 2, 2020
Maiibanan na an kabaraka han mga residente han Brgy Boroc ngan Brgy San Pablo ha Ormoc City. Ini in dara kay an mga Suspected COVID Cases ha ira lugar in negatibo han virus.
Kakulop nga adlaw, hi Mayor Richard Gomez in nagpasamwak nga negatibo an resulta han confirmatory tests han mga Suspected Cases dida han duha nga barangay. Sobra na usa ka semana nga iginbutang ha lockdown an mao nga mga barangay samtang ginhuhulat an resulta han testing ha Cebu.
Ginkuhaan gihapon hin samples an mga paryente han mga Suspected Cases ngan negatibo gihapon an resulta. Pero igpapadayon an monitoring han LGU hini nga mga tawo ug an iba nga ira iginka-urusa.
Hinungdan hini, gintanggal na an lockdown ha Boroc ngan Purok 7 han San Pablo.
Magpapabilin naman nga naka lockdown an Purok 10 ha Brgy Linao didto gihapon ha Ormoc. Usa nga mulopyo hini nga lugar an nagpakita hin sintomas han virus ngan positibo hiya ha Rapid Anti-Body Test. Dara hini, ginkuhaan hiya hin swab sample basi igpailarum ha laboratory confirmatory test ha Cebu. Samtang ginhuhulat an resulta, naka lockdown an mga residente hini nga lugar.
Upat na ka adlaw nga igin lockdown ni Gomez ini nga parte han Brgy Linao. #
