(File photo Improvised Explosive Device by kalinawnews)

Isumat.com/9:07AM,May 4, 2020

Upat nga mga Improvised Explosive Device (IED) an nakuha han mga tropa han gobyerno ha ligid han national highway ha Brgy Madalunot, Pinabacdao, Samar.

Sumala han impormasyon, may mga residente han nasabi nga lugar nga nakakita hin deri kilalado nga mga kalalakin-an nga nagliniyong-liyong dida hini nga dapit ngan kadagmitan ira ini iginsumat ha mga kasundaluhan.

Pumakadto dayon an mga sundalo ug ira na-ukab an upat nga bomba ngan kadagmitan nira ini igin turn-over ha Samar Provincial Police Office.

Kun aton manunumduman, dida gihapon hini nga lugar nabuthan hin bomba an usa nga police service vechicle nga ig-dedeliver unta ngadto ha Mindanao pira na ka bulan an nakalabay. Gintotoohan han mga otoridad nga an mga kaapi han rebelde nga New People’s Army an nagpapaluyo hini nga insidente.

Samtang, lima naman ka tawo an na-aresto dara han pagtupada didto ha Brgy Nauguisan, Carigara, Leyte kakulop nga adlaw. Ginkilala an mga suspetsado nga hira Mark Anthony Madejas, 30 anyos nga seaman; Rodolfo Dollete, 30 anyos nga construction worker; Romulo Agonon, 49 anyos nga negosyante; Lerio Obaob, 37 anyos; ngan Leo Obaob, 39 anyos. Hira ngatanan in mga residente hin magkalainlain nga barangay han Carigara.

Ini nga lima amo an nagkadadakop samtang damo pa nga iba an naka-eskapo han mag ronda an mga kapulisan ug naaktuhan hira nga nagbuburublang.

Nakumpiskar han mga tinubynan han balaud in napulo nga igburulang nga manok, pusta nga nagkakantidad hin dos mil kuatro syentos pesos, ngan mga sarakyan han mga suspetsado.

Gindara ini nga mga suspetsado ha Carigara PNP ngan gin-aandam na yana an mga kaso nga igsasalawad kontra ha ira. # (KEVIN SIOSANA)