Isumat.com/8:02AM, Enero 22, 2021
Waray lugar ngan sarado para han mga kaapi han terorista nga New Peoples Army an 1.513 nga mga barangay ha Sinirangan Bisayas.
An 8th Infantry Division han Philippine Army nga nakabase ha Catbalogan City, Samar in nagpasamwak nga tobtob han Disyembre 2020, umabot na ha 1,513 nga barangay han rehiyon an nagpasa hin resolusyon nagdedeklarar han mga rebelde nga kumunista nga Persona-Non-Grata ha ira tagsatagsa nga lugar.
Ini nga nagdeklarar in 34% han kanan rehiyon 4,390 nga mga barangay. Antis pa hini, naghimo na gihapon hin parehas hini nga aksyon an unom nga mga probinsya, pito nga mga syudad ngan 136 nga mga munisipalidad ha bug-os nga Rehiyon Otso.
Samtang, nagpapadayon naman an pagtimangno han gobyerno han mga nakatalwas han Inopacan Massacre nga ginbuhat hadto han CPP-NPA.
33 nga survivors hini nga pagmasaker an nagpa-ilarum hin skills training pinaagi han TESDA-Leyte. Hira in nakagtapos han Electrical Installation and Maintenance ngan Motorcycle/Small Engine Servicing. An graduation an gindumara hadin nag-agi nga semana ha Baybay City.
Tungod hini, ginlalauman nga makakabulig ha pagpakabuhi hini nga mga biktima an kina-adman nga ira naangkon tikang ha TESDA.
Hadton Dekada 80, an CPP-NPA in nagmasaker hin sobra 100 katawo nga ira gintotoohan nga nagtraydor han ira kagi-usan ngan nasuporta na han militar. #
