Isumat.com/5:32AM, Marso 10, 2021
Magdudumara hin imbestigasyon an National Bureau of Investigation (NBI) han panhitabo kun diin namatay hi Calbayog City Mayor Ronaldo Aquino ngan lima pa nga iba lakip na in tulo nga kapulisan.
Hi Justice Secretary Menardo Guevarra an nagmando ha NBI nga mag-imbestigar han insidente hadin Marso 8 ha Brgy Lonoy han nasabi nga syudad. Minanduan ni Guevarra an ahensya nga magsubmiter hin report ha iya ha sulod hin napulo ka adlaw.
Antis hini, hi Samar 2nd District Congressman Edgar Sarmiento, apiki nga ka-alyado ni Aquino, an nanawagan nga kinahanglan NBI an mag-imbestigar ngan deri an Philippine National Police kay nadadabi an mga kapulisan han panhitabo. Sering ni Sarmiento, angay la nga NBI an magsusi basi magin patas an imbestigasyon.
Dida han panhitabo, namatay gihapon an police-escort han alkalde sugad man duha nga kapulisan tikang ha Samar Drug Enforcement Unit ngan Integrity Monitoring Group. An drayber han sarakyan ni Aquino sugad man usa pa nga sibilyan nga naigo hin layaw nga bala in naawat gihapon an kinabuhi.
Nagkaka-impati yana an mga bersyon han panhitabo – nagsering an inisyal nga panginano han PNP Region 8 nga naha-una pagpabuto an panig han alkalde tungod kay nagdududa hira nga ginsusundan hira han van han kapulisan.
Mayda gihapon anggulo nga ambush an panhitabo kay gintarget gud an sarakyan ni Aquino ngan nakahimo la pagbulos an iya mga kaupdanan.
An PNP in nagmugna na gihapon hin Special Investigation Task Force nga gintu-inan mag-imbestigar han insidente.
Ginklaro naman han PNP nga hi Aquino in deri lakip han mga personalidad dida han Narcolist o nalalambigit ha iligal nga droga nga ginkakaptan han mga otoridad. Posible daw nga iginkatuman la nga mayda operasyon an grupo han Samar Drug Enforcement Unit didto han lugar kun diin nakadto hi Aquino.
Nalutaw naman an dako nga paki-ana kun kay-ano nga nagpaka-bonnet an gin-aalegar nga nanmusil ngadto han grupo nira Aquino ngan mayda pa gud natad-an nga mga plate numbers ha ira sarakyan.
Hi Congressman Sarmiento in nagdidig-on nga ambush an nahitabo ngan deri shoot-out subay na gihapon han pahayag hin pira nga testigos.
Hi Presidente Rodrigo Duterte lakip na an kadam-an nga mga opisyales han Samar sugad man an Diocese of Samar in nagkondenar han panhitabo. Nababaraka an Malakanyang nga posible magdurot pa ini hin kasamok samtang nagtitikaharani an piinili-ay.
Ha iya bahin, nagsering naman hi Vice-President Leni Robredo nga ka-usa han namatay nga alkalde ha Liberal Party, nga abnormal na ini nga panhitabo ha Pilipinas kay waray wantas an panmatay kun diin an mga biktima mga mayor, community organizers, mga abogado, huwes, taga-media, ngan pati na kabataan.
Nanawagan gihapon an Bise-Presidente hin toltol ngan waray ginpapanigan nga imbestigasyon han pagkamatay ni Aquino. #
