Isumat.com/6:30AM, Enero 14, 2021

Ginbay-og an NBA han makokonsiderar nga usa han gidadaku-i nga trade o pabarubalyo-balyo hin players pira pala ka oras an nakalabay.

An nag-a-alburuto nga scoring machine han Houston Rockets nga hi James Harden in ha katapus-tapusan natumanan han iya hingyap nga makagawas na ha Houston ngan hiya in mabalhin ha Brooklyn Nets.

Tungod hini, an Nets in klaro na nga makakasulod ha playoffs ngan posible pa ngani nga magin contender ha Eastern Conference ngan NBA Finals kay mag-uurusa na hin pwersa hira Kevin Durant, Kyrie Irving ngan Harden.

Upat nga mga teams an nahidabi hini nga blockbuster deal ha NBA:

An Houston Rockets makarawat kan shooting guard Victor Oladipo tikang ha Indiana; sugad man walo nga first round draft picks ha tuig 2021,2022,2023,2024 tikang ha Cleveland, Brooklyn, Milwaukee ngan Indiana.

An Brooklyn in makarawat kan Harden ngan usa nga 2nd round pick.

An Cavaliers in magkakaada kan Jarret Allen ngan Taurean Prince tikang ha Brooklyn.

Samtang an Indiana Pacers in makakakuha han serbisyo ni Chris Lavert ngan usa nga 2nd round pick.

Dida hini nga balyu-ay hin players, segurado gud nga nadugangan hin offensive firepower an Nets, pero nawara liwat ha ira an importante nga mga role players nga hira Lavert, Allen ngan Prince. Ini in labot la han deri pakamulay defense specialist Spencer Dinwiddie nga nagkaada hin ACL injury ngan usa ka season nga deri makakagserbisyo ha Brooklyn.

Samtang, igin report gihapon nga dako an posibilidad nga deri na mabalik pagmulay hin usa ka season hi Irving. Sugad-sugad nga dako an personal nga isyu nga gin-aatubang yana han basketbolista sanglit napwersa an Nets nga kuhaon hi Harden bisan kun mawawara ha ira an pira nga importante nga role players.

Hi Harden in maiha na nga nag-aarungot ngan deri nagtutuhay pagmulay ha Houston kay karuyag na gud niya lumayas ngan gusto makatilaw hin korona ha NBA labi na yana nga nagtitika-edaran na hiya. #