Igindig-on han Regional Office han Department of Health nga deri an sakit nga COVID-19 an rason han kaawat han kinabuhi hin usa nga tawo ha Abuyog, Leyte.
Dida hin usa nga official statement nga iginpagawas han ahensya kanina han aga, Abril 1, 2020, ginklaro ni Regional Director Minerva Molon nga an namatay in usa anay nga Person Under Investigation (PUI) pero antis hiya namatay in nahuman na an iya 14-dias nga home isolation ngan waray na ini mga sintomas nga gin-aabat nga parehas han mga sintomas han COVID-19.
Igindugang pa ni Molon nga ugsa pa ngani magin PUI ini nga tawo, mayda na hini gin-aantos nga sakit ha atay ngan sumala han pagsusi han Regional Surveillance Unit ngan iginpapakita han medical records nga an iya sakit ha atay an hinungdan han iya pagtalikod ha kadayunan.
Kasumpay hini, utro gintagan hin duon han DOH nga ini nga kaso in waray kalabutan an COVID-19.
Dida han nag-agi nga adlaw, gumawas ha social media in pira nga posts nagmamalatumat nga may namatay nga usa anay nga PUI ug kadam-an nga nagpakabasa hini in nagkababaraka nga bangin may matabo nga local transmission han makamaratay nga kagaw ha ira lugar.
Nagpahayag pa ngani an mga posts ha facebook nga pira na nga mga residente han barangay kun diin naukoy hadto an pasyente in karuyag na bumalhin anay hin lugar nga ma-uukyan tungod han kahadlok nga matapnan han virus.
An DOH in utro nga nagsasagdon nga deri gud dayon magpagawas o tomood hin mga hurobhurob labi na kun deri otorisado an gintitikangan han nasabi nga mga notisya.#
(Posted 1:46 PM, April 1, 2020)
