Isumat.com/1:05PM, October 30, 2020
Sobra la hin usa ka bulan an nag-agi han magpakamatay in usa nga ulitawo ha Tacloban City tikang maghikog an iya sangkay ha Palo, Leyte.
Ini an lumutaw ha inisyal nga imbestigasyon han Tacloban PNP Station 2 kasumpay han pagpakamatay kakulop, Oktubre 29, hin 21-anyos nga ulitawo, residente han Brgy 72, PHHC Housing. An patay nga lawas han biktima in nadiskubre han iya pamilya didto han ira panimalay pasado alas 9 han aga ngan kadagmitan iginreport ha kapulisan.
Sumala kan Major Daniel Polo, hepe han Tacloban PNP Station 2, an biktima in nagtatrabaho ha singbahan han St Jude Thadeus dida han nasabi nga lugar ug an ira balay in atbang la han singbahan.
Dida han Oktubre 28, fiesta didto han nasabi nga lugar ug an biktima ngan han iya kasangkayan in nagtagay-tagay. Dida han ira harampang, an biktima in pira ka beses nga nagsering nga magpapakamatay hiya. Ginsagdunan hiya han iya mga kaupdanan nga deri iton buhaton kay dako nga sala.
Waray magdahom an kaupdanan ngan pamilya nga tutud-on han ulitawo an iya iginpamulong kay pagkabuwas natad-an nala nga nabitay na an iya patay nga lawas. Antis matad-an an patay nga lawas, an biktima in nagpost pa ha facebook hin emoji nga mabido-on.
Sumala kan Polo, an biktima in mahilom la nga tawo ngan deri gud ma-istoryahon. Nagsering an iya pamilya nga waray mag istorya ha ira nga may problema o may depresyon an biktima.
Dida han imbestigasyon, nahisabtan gihapon han kapulisan nga magsangkay an biktima ug an lalaki nga nagpakamatay ha Palo hadton Setyembre 13, 2020. An naghikog ha Palo in gintotoohan nga nabido hin duro tungod han pakigbulag ngan pag-asawa hin iba han iya oyab.
An mga imbestigador in blangko pa hapagkayana kun ano an motibo hini nga pagpakamatay ha PHHC kay waray man natad-an nga suicide note. #
