Waray makakagawas ngan waray makakasulod ha Barangay Balao ngan Barangay Hapunan ha Burauen, Leyte. Ini in subay han Modified Lockdown nga igin-implementar dida hini nga mga barangay.
Ini an iginpahayag ni Burauen Mayor Juanito Renomeron kadungan han pagpasamwak nga an bug-os nga bungto amo in ginpa-ilarum hin Restrictive Community Quarantine tobtob Abril 30.
Ini nga aksyon han LGU in kasumpay han pag positibo han COVID-19 hin usa nga babaye didto han ira munisipalidad. Hinsabutan nga didto ha Balao nag-uukoy an 58-anyos nga babaye ug an Hapunan amo an barangay nga sapit nira ug posible mayda ginka-urusa an pasyente nga iba nga tawo.
Dara hini, an mga residente dida han nasabi nga duha nga barangay in deri na makakagawas ha ira lugar ug an LGU amo an maghahatag han ira mga panginahanglan tobtob nga maseguro nga talwas ha corona virus an katawhan didto.
An iba naman nga barangay in makakagawas la gihapon an mga tawo pero an mga otorisado la pag gawas ha ira balay. Ginsasagdunan gihapon ni Renomeron an ngatanan nga taga-Burauen nga deri gumawas han ira bungto.
Iginpatapod naman han alkalde nga nagpapadayon an paghatag han serbisyo han LGU ngadto han mga bungtuhanon. Mas papahugton gihapon an pagpasunod han kwarentina basi deri na makatapon pa an virus.
Ginklaro pa ni Renomeron nga posible pa nga magkamay-ada hin extension an kwarentina paglapos han Abril 30 kun deri magtika-upay an sitwasyon ha ira munisipalidad.
Nanawagan an amay han bungto ha iya igkasi taga-Burauen nga mag-ampo ug mangaro hin bulig han ira patrona Immaculada Concepcion sugad man liwat an iya hangyo nga magin disiplinado an katawhan labi na yana nga panahon han kataragman. #
(Posted 10:32 AM, April 18, 2020)
