Isumat.com/Marso 18, 2022
Maghahabak hin salapi an tipster o importante nga nagsumat ha kapulisan mahitungod han presensya hin armado nga kalalakin-an ha usa nga barangay ha Jiabong, Samar kun diin nagresulta hin enkgwentro ha butnga han mga tropa han gobyerno ngan New People’s Army.
Naawat an kinabuhi ha nasabi nga insidente hadin Marso 16, 2022 hi Amado Adelantar, alyas Kumander Butil nga miembro han Executive Committee ngan Secretariat han Regional Party Committee han CPP-NPA ha Eastern Visayas.
Hi Adelantar in may patong nga 2.9 Milyones pesos nga reward money ngan ini nga salapi in premyo ngadto han naghatag hin impormasyon nga magreresulta han iya kadakop o kamatay.
Ha pakighimangraw han iFM-RMN Tacloban, nagsering hi PSgt Charles Coprada, imbestigador han insidente, nagsering hiya nga tinood ito nga may reward money kun madakop o mamatay hi Butil.
Nagsering hi Coprada nga an reward money in ighahatag ngadto han sibilyan o mga sibilyan nga naghatag hin impormasyon ngadto han kapulisan.
Pero ginklaro ni Coprada nga maghihimo pa hin hingpit nga validation basi mapamatud-an gud kun hin-o an angay maka-agom han reward money.
Hi Butil ug an iya misis nga finance officer han NPA in namatay dida han enkwentro ha Brgy Alejandrea, Jiabong Samar han maagahon hadin Marso 16. Iginkapusilay an ira grupo han operating team nga ginkokomponer han Jiabong PNP ngan mga kasundaluhan han 87th Infantry Battalion.
Tobtob kakulop, Marso 17, 2022, waray pa mga paryente han duha nga nagkamamatay nga nagpakita basi kuha-on an ira patay nga lawas ha usa nga punerarya ha Catbalogan City.
An kumander han NPA in damo an gin-aatubang nga mga kaso ha hukmanan nga ginlalakipan hin murder, attampted murder ngan robbery with homicide.
Nakuha dida han lugar han asdangay in usa nga sub-machine gun, 9 mm pistol, duha nga granada ngan mga dokumento.
An upat nga kaupdanan nira Butil in umeskapo ngan ginbayaan an ira lider ug an iya misis nga nasamaran dida han engkwentro. Gintalinguha pa han mga otoridad nga madara ha hospital hira Adelantar pero igindeklarar nga dead on arrival han mga doktor.
Waray naman naigo o naawat an kinabuhi ha panig han pwersa han gobyerno.#
