Deri la an kakapoy ngan damo nga mga buruhaton ha eskwelahan an ginpapas-an nga pag-ayat han mga estudyante sugad man mga magtatrabaho dida han mga eskwelahan nga namumutang han tinatawag nga “university belt” ha Tacloban.
Labot la han mga insidente hin snatching ngan pickpocket, aada gihapon nag dudurot hin peligro an mga tawo nga may problema ha pan hunahuna o pan muruboot. Dida han nag-agi nga gab-I, usa nga estudyante ha Eastern Visayas State University o EVSU an gin balbag hin gin totoohan nga babaye nga may mental problem.
Tres metros an kahilab-on nga kahoy an gin gamit hini ha pagmalmal han biktima nga tipa-uli na unta tikang ha eskwelahan. Nagbabaktas an 21-anyos nga estudyante nga lalaki ha santa cruz street harani ha grandstand han tigda la hiya balbagon hinungdan han kasamad han iya ulo. Kadagmitan pinmakadto an biktima ha ospital basi mag patambal ngan waray na hisabuti kun nagpakain an nagbalbag ha iya.
Dida han panmaki-ana han Isumat.com , hinsabutan nga labot la hadto nga babaye, mayda gihapon usa pa nga lalaki nga usahay ira nakikit-an ha eskina harani ha main gate han EVSU nga kun tinutulos nagpipinantapo han mga umaragi kun diin may dara dara pa ini usahay nga pisaw.
Sumala naman kan Police Captain Marjorie Manota, tagyakan han Tacloban City Police Office, ginpa huruhugtan na han ira kapulisan an pagpatrolya hini nga lugar labi na nga damo hin duro an katawhan labot la han mga residente.
Dida hini nga lugar namumutang an mga boarding houses han kadam-an nga mga estudtanyte han EVSU, Leyte Normal University ngan Leyte National High School. Ini nga lugar an na ngangaranan nga “university belt” kay yinukot-yukot nga mga estudyante tikang han nasabi nga mga eskwelahan an nagpa pasoy-pasoy han mga ka kalsadahan han santa cruz, paterno, Salazar ngan ninoy Aquino avenue.
Matuod, ginklaro ni Manota nga deri ha ngatanan nga panahon makakag bantay an mga police personnel kay damo pa an ira iba nga obligasyon labot la han seguridad. Hira in gin tuinan gihapon nga manakop han natalapas han anti-littering ngan anti=smoking nga mga ordinansa han syudad. Igin sagdon pa han opisyal nga kun mayda sugad hini nga insidente, magpadangat hin impormasyon ha gilayon nga takna ha ira buhatan basi katagan dayon hin aksyon.
Nagsagdon gihapon hi Manota ha mga paryente hini nga mga tawo nga mayda mental problems nga panginanoon ini hira kay hira an panguna nga mayda obligasyon pag timangno. #
