Ha deri maiha nga panahon, matutuman na an inop han taga Eastern Samar nga hi Aravim Jill Sumook Bardinas nga makagmulay ha womens basketball tournament han Universities Athletic Association of the Philippines o UAAP. Hi Bardinas nga taga Salcedo, Eastern Samar in ha pagka yana kaapi han Team B para han Lady Tamaraws han Far Eastern University. Pero dako hin duro an iya paglaum nga magigin miembro hiya han Team A pira ka bulan tikang yana kay katunga han mga players amo in ma graduate na ha kolehiyo ngan deri na kwalipikado nga magmulay pa para han unibersidad.
An UAAP amo an ginkikilala nga pinaka prestihiyoso nga liga hin mga unibersidad ha bug-os nga nasud sanglit dako gud nga onor an maka api han mga torneo hini. Hi Bardinas in nagpahayag nga duro an iya paniguro ha ensayo basi magin kaapi na hiya han Team A labi na nga iya igkaka-usa ha team an iya idolo nga hi Claire Castro nga miembro han Perlas Pilipinas nga nagin kampeon han nakalabay nga South East Asian Games.
Hi Ara in nagin kaapi anay han EVRAA team kun diin lima ka beses hiya nga nagtaglawas han Rehiyon Otso ha Palarong Pambansa tikang han 2014 tobtob han 2018. Iya iginsumat nga dida han iya pagtikang komo miembro han EVRAA, nagin bench player la anay hiya, pero dida han 2017 nagin kaapi na hiya han starting five tungod han iya paningkamot nga umuswag pa an iya minulayan.
Dida hini nga iya pagminulay ha Palarong Pambansa, gintagusya hiya han mga scouts han mga eskwelahan tikang ha Metro Manila, kun diin pira hini nga mga unibersidad an nag-opreser ha iya hin scholarship basi la bumalhin ha ira eskwelahan.
Iya ginpili an FEU, sanglit katapos han iya grade 11 han senior high school ha ESSU-Salcedo Campus, binmalhin hiya ha FEU ngan didto nagtapos han iya senior high komo kaapi han junior team. Hadin nag-agi nga tuig, nag-enroll hiya hin BS-Psychology nga kurso ngan nakasulod ha Team B han collegiate team.
Dida ha FEU. An 5-foot seven nga hi Bardinas in nagin small forward an iya posisyon tikang han iya pagin sentro ngan power forward han nagmumulay pa hiya para han EVRAA. Hi Ara in nag-eskwela han elementarya ha Salcedo kun diin nag-oyag liwat hiya hin chess, badminton ngan volleyball. Pero dara kay hitaas man hiya, ginkumbinser hiya han iya kasangkayan nga mahilig hin basketball nga umapi ha ira mulay.
Aada ha lahi ni Ara an pagigin atleta kay an usa nga ira paryente in nagin varsitarian hadto ha Arellano University ug an magurang nga ate ni Ara in nagin tennis player han SCUAA han na-eskwela pa ini ha ESSU. Hiya amo an manghod han upat nga mga anak nira Manuel ngan Vivian Bardinas.
Hinsabutan gihapon nga plano unta hadto niya nga ha Leyte Normal University mag kolehiyo labi na kay adto nagmumulay an iya mga teammate han EVRAA, ugaring la kay waray kurso nga BS-Psychology han nasabi nga unibersidad. #
