Isumat.com/3:30PM, June 13, 2020
Naginyupo hi Mayor Arnel Tan ha publiko ngan mga establisemento nga magin patas ha pagtratar han mga residente han Tarangnan.
Ginhimo ini nga panawagan ni Tan ha atubangan hin mga insidente nga may pribado nga bangko ngan opisina hin gobyerno ha Catbalogan City nga waray manginano anay han tinood nga kahimtang han Tarangnan ngan ginpagawas ha ira establisimento an pumakadto nga mga Tarangnanon.
Ginklaro ni Tan nga deri ngatanan han barangay ha Tarangnan in aada ha Enhanced Community Quarantine ngan mayda iba nga barangay nga aada na ha Modified General Community Quarantine. Sering han alkalde, subay han guidelines han Samar Provincial Government, gintutugutan na paggawas han Tarangnan an mga nag-uukoy ha MGCQ nga barangay. An deri gintutugutan kun ECQ pa an lugar nga gin-uukyan.
Sumala pa han alkalde, haros ngatanan na nga residente han bungto in nakuhaan na hin swab sample ngan negatibo an resulta labot la han sobra 20 ka tawo nga nag positibo. Pinaagi hini, kun aada ha MGCQ, waray unta problema an mga transaksyon ha gawas han bungto.
An Local Chief Executive in nagsering nga duro na ka maiha an panahon nga ira pag-antos dara han corona virus, ngan waray man nira kasaypanan kun mayda natapnan ha ira bungto. An iya la ginhahangyo nga unta waray deskriminasyon nga natatabo kontra han mga bungtuhanon.
Nag-esplikar pa an pinuno han bungto nga waray problema ha iya kun papagawson han mga establisemento an mga nakakalusot tikang han ECQ Barangay kay sakto ini nga proseso, pero kun tikang ha MGCQ nga lugar ngan mayda kaangayan nga papeles, kinahanglan atenderan han establisemento kun ano man an iya transaksyon.
Kadungan hini, ginkondenar naman ni Tan an pira nga mga Tarangnanon nga nakakalusot pag-gawas han mga barangay nga aada pa ha ECQ. Sumala ha iya, waray maupay nga pamatasan ngan pasaway ini nga mga residente kay naghihimo gud hin paagi nga makalusot bisan kun deri puede paglakat.
Aminado hi Tan nga deri ha ngatanan nga panahon mababantayan nira an ngatanan nga parte han mga ECQ Barangays kay halaba hin duro an kabaybayunan han ira bungto ug an iba in napasangil nga mananagat o maalog hin tubig nga irimnon para la makalusot. # (KEVIN SIOSANA)
