Isumat.com/7:21AM, Nobember 25, 2020
Deri igkaka-urusa ha ira mga paryente ngan kasangkayan ha Pasko ngan Bag-o nga Tuig an mga Locally Stranded Individuals nga nagpaplano pag-uli ha Biliran para han nasabi nga mga okasyon.
An Provincial Covid Task Force an nagdesisyon kakulop nga tinikangan Disyembre 10, 2020 tobtob Enero 3, 2021, temporaryo nga suspendido an pagkarawat han lalawigan han mga LSI nga mabalik ngadto.
Nagsering hi Governor Rogelio Espina, ini nga pitad in agud kabalabgan an peligro han tigda nga paghitaas han mga kaso han Covid-19 kun tutugutan nga maka-uli ngadto han probinsya an mga LSI. Hini gud man nga mga panahon, batasan han mga Pilipino nga mangunguli ha ira tagsatagsa nga probinsya basi igka-urusa han ira pamilya.
Ginklaro naman han Task Force nga an mga LSI nga nakapalit na hin ticket ha transportasyon tobtob han Nobyembre 30 ngan naka-eskedyul an biyahe dida han Travel Ban in puede la gihapon makasulod ha Biliran basta kumpleto la hira han mga dokumento ngan kaangayan nga koordinasyon ha mga LGUs.
Samtang, gin-implementar naman an gihata-asi nga lebel han kwarentina ha Lawaan, Eastern Samar komo pitad han LGU nga deri na magtikadamo pa an kaso han Covid ha ira bungto.
Tinikangan yana nga adlaw, Nobyembre 25 tobtob Disyrmbre 9, papayungan han Enhanced Community Quarantine (ECQ) an munisipalidad. Tigda nga nadugangan an mga nagpositibo ha Lawaan hadin nag-agi nga pira ka adlaw ngan gintotoohan nga nagkatatapnan hira han iba nga nagpositibo han paghargrani nga bungto.
Ha ilarum han kamanduan, igpapatuman an curfew tikang alas 8 han gab-i tobtob alas 5 han maagahon. Tag-usa la ka tawo an makakagawas ha kada panimalay basi pumalit han ira mga panginahanglan. Suspendido gihapon an operasyon han mga videoke bars ngan iba pa nga klase hin liaw-libang.
Na-obserbaran gihapon nga an Eastern Samar an nagtitikadamo an mga kaso han Covid, labi na ha Sur nga parte han lalawigan. Kun han una nga mga bulan, haros Zero-Cases an probinsya, deri na ini amo an sitwasyon yana kay haros kada adlaw, pira nga mga Estehanon an natatapnan han kagaw.
Iginreport naman han DOH-Regional Office nga umabot na ha 8,371 an Total Cases han rehiyon tobtob Nobyembre 24. Dida hini, 7,688 (92%) an nakatalwas ngan 84 an naawat an kinabuhi. Hapagkayana, 560 an Active Cases. #
