An Probinsya han Cebu nag-implementar na hin travel ban.

Gintikangan na han Cebu Provincial Government an travel restriction o deri pagpasulod hin bisan hin-o ngadto han ira lalawigan. Ini an nagin kasugu-anan ni Cebu Governor Gwendolyn Garcia komo kaparte han mga pitad basi deri na magsinarang an COVID-19 kun diin 111 na ka tawo an nag positibo hini nga sakit ha Pilipinas.

     Ha ilarum hini nga kamanduan, tinikangan yana nga adlaw, Marso 15 ug mahagos hin 30 dias, sakop hini nga travel ban an magkaka-abot pinaagi han Mactan Cebu International Airport (MCIA) ngan tanan nga mga pantalan han Cebu.

     An flights tikang ha Manila ngan Dumaguete in deri na pude tinikangan yana nga adlaw, samtang an mga eroplano tikang ha Cagayan de Oro, Legaspi City ngan Clark in deri na liwat puede tikang Marso 16, 2020, Lunes. An iba naman nga mga domestic flights in magtitikang an travel ban dida hiton Marso 17, Martes.

     Para naman han mga seaports, an mga biyahedor tikang ha Dumaguete deri na makakasulod ha mga pantalan tikang Marso 15. Ngan dida hiton Marso 16, deri na gihapon makakadunggo an mga sakayan tikang ha Negros Oriental ngan Negros Occidental. An mga pasahero naman nga tikang ha iba nga probinsya in deri na gihapon makakasulod pinaagi han seaports tinikangan hiton Martes, Marso 17.

      Ginklaro naman ni Garcia nga an mga tawo ha Cebu nga karuyag gumawas han probinsya in tutugutan nga lumakat, pero deri na hira makakabalik ha sulod han panahon nga mayda travel ban.

     Iginpatapod pa han gobernadora nga magpapadayon naman an biyahe han mga sarakyan nga nagdadara han mga supplies labi na an pagkaon ngan importante nga mga gamit han katawhan.

     Nagpadulot na gihapon an lalawigan hin curfew tikang alas 10 han gab-i tobtob alas 5 han maagahon. #