Isumat.com/8:19AM, Pebrero 12, 2021
Nakarekupo an mga tropa han gobyerno hin mga armas ngan mga higamit han ira pagsulungon in usa nga kampo han terorista nga New Peoples Army ha Northern Samar.
An mga kaapi han Northern Samar PNP Mobile Force Company an nagdumara hin operasyon ngan ira nasulod an kampo ha Brgy Happy Village, ha bungto han San Isidro. Nakuha han kapulisan in granada, kadam-an nga bala hin M-16, ngan personal nga mga gamit han walhon nga grupo.
Antis hini, an sumurender nga rebelde alias Ka Renz an nagsumat ha mga otoridad kasumpay han kinamumutangan han nasabi nga kampo.
Hadin nag-agi nga pira ka semana, nagsunod-sunod an pagbalik ha panig han gobyerno hin pira nga rebelde didto han nasabi nga probinsya. #
