Isumat.com/7:51AM, Pebrero 12, 2021

Waray na maghulat nga sikmiton pa hiya han mga otoridad ngan boluntaryo nala nga nagtubyan han iya kalugaringon in usa nga kaapi han Philippine Army nga ginsampaan hin kaso nga rape ha Samar.

Sumala han report han PNP, an akusado in ginkilala nga hi Pvt 1stClass Junrie Luna, miembro han 46th Infantry Batallion ngan nakadestino ha Calbiga, Samar. Hiya in sumurender ha PNP Office han nasabi nga bungto hadin nag-agi nga adlaw.

Hi Luna nga residente han Brgy East Awang, Calbayog City, in mayda Standing Warrant of Arrest nga ginpagawas han RTC-Branch 33 ha Calbiga tungod hin kaso nga panlugos. Waray igpahayag han report an detalye han nasabi nga kaso.

An akusado in nakapaslak yana ha Calbiga Municipal PNP Station. #