Isumat.com/8:38AM, April 23, 2020
Nanawagan hi Mayor Alfred Romualdez ha mga nagmamaneho ngan mga pasahero han mga ambulansya ngan government vehicles nga deri abusaran an pag gamit hini nga mga behikulo labi na yana nga panahon han COVID-19 pandemic.
Durante han press conference kakulop, nagpahayag hi Romualdez nga damo na an mga impormasyon nga nakakadangat ha iya nga may mga ambulansya ngan mga behikulo han gobyerno nga tiikang ha iba nga bungto ngan syudad nga nag liliniyong-liyong pa ha Tacloban bisan kun tapos na an ira toyo.
An iba hini nga mga ambulansya in nasisipatan daw nga adto ha merkado ngan mga tindahan ug ginkakargahan hin mga grocery items ngan iba pa. Amo gihapon ini an na-obserbaran nga istilo ha mga government vehicles. Mayda liwat mga reports nga katapos han pagdul-ong han pasyente, nahapit pa ha pan merkado an mga sakay han ambulansya.
Sumala han alkalde, kun tapos na maghatod han pasyente an mga ambulansya nganhi ha mga hospital han Tacloban, kinahanglan nga lumakat ngan gumawas na ini dayon han syudad ngan deri na magparu-pasyada. Gin-awhag gihapon niya an mga nagkakapot han mga government vehicles nga gamiton la an sarakyan han opisyal nga obligasyon ngan deri personal nga panginahanglan.
Nagpahayag hi Romualdez nga gintutugutan an pagsulod hini nga mga behikulo ha Tacloban kay importante an rason, pero deri liwat maupay kun gin-aabusaran na ini. Gintagan hin duon han amay han syudad nga lakip ini han mga pitad basi deri na magsarang an makamaratay nga virus.
Kasumpay hini, nanawagan hi Romualdez ha mga mulopyo nga ig report dayon ha mga otoridad kun may makikit-an nga mga ambulansya ngan iba pa nga behikulo han gobyerno nga nakatambay ha merkado ngan iba pa nga establisemento nga deri angay nira kadtu-an. #
