Isumat.com/8:13PM, April 22, 2020

Nagpagawas hin kabatunan an DOH-Region 8 kasumpay han isyu kun kay-ano nga ha Eastern Visayas Regional Medical Center-Magsaysay (Tacloban) la gindadara an mga tawo nga positibo han corona virus ha Sinirangan Visayas.

Pira pala ka oras an nakalabay, hi Tacloban City Mayor Alfred Romualdez in nagpabati han iya panawagan ha DOH nga deri ngatanan han COVID Positive ig-confine ha EVRMC. Sumala kan Romualdez, kun maupay an kahimtang han panlawas han pasyente, puede man deri na dad-on ha EVRMC ngan didto nala ig-kwarentina ha ira tagsatagsa nga lugar o probinsya tobtob nga maka recover. Nagsering gihapon an alkalde nga an mga seryoso o severe symptoms an sitwasyon amo nala an dad-on ha EVRMC-Tacloban.

An DOH-Region 8 in nagpagawas hin opisyal nga pahayag dara hini nga isyu ug ira gindig-on nga nagsusunod la hira han kamanduan han DOH-Central Office subay na gihapon han rekomendasyon han World Health Organization. Dida han kamanduan han Central Office, obligasyon han mga referral hospital nga magdumara han pagtambal han kumpirmado nga may COVID-19 ngan mga PUI nga nagpapakita hin seryoso nga mga sintomas ngan comorbidities. Ha pag-istudyo han isumat.com, an tinatawag nga comorbidities amo in usa nga pasyente nga mayda usa o duha o sobra pa hin duha nga klase hin sakit nga nagdudurungan nga gin-aabat.

Igin-esplikar pa han ahensya nga aadto la ha EVRMC an mga doktor ngan espesyalista nga may kapas pagkapot han sugad hini nga mga kaso. Iginpatapod gihapon han DOH nga dida han pagbyahe han mga COVID Positive tikadto ha EVRMC, an mga personales nga nadadabi in nagpa-ilarum han insakto nga training ug nakasul-ot han Protective Equipment ngan mayda nira mga higamit ha pag proteher nga deri matapnan han sakit.

Kataliwan hini, an mga personales, higamit ug an ambulansya in ginpapa-ilarum hin disinfection. Waray gihapon upod nga bantay an pasyente kundi an mga health workers la.

An mga LGU ug health facilities ha mga bungto amo an syahan nga magtitimangno han mga tawo nga mayda sintomas samtang naghuhulat han resulta han testing. Kun magin positibo ha virus an resulta ngan sobra na 60 anyos an edad ngan may comorbidities an pasyente, kinahanglan dad-on na ini ha EVRMC kay amo man ini an guidelines han departamento.

Kadungan hini, ginseguro han DOH nga ira ginhihimo an ngatanan basi deri maglarab an kagaw ngan nanawagan pa an ahensya nga unta waray matabo nga deskrimnasyon ngadto han mga magsakit.

Antis pa hini, hi Mayor Romualdez in nagpabati han iya kabaraka han posibilidad nga mayda matapnan ha Tacloban kay nahihimo na daw nga “dumping station” han COVID Positive an EVRMC nga namumutang ha syudad. Hi Romualdez in nanginyupo nga kun mahihimo an may severe conditiions la an ig-admit ha EVRMC ug an mga pasyente nga magkusog in didto na la igpa-recover ngan tambalon ha ira mga munsipalidad. #