Isumat.com/ Disyembre 20, 2022
Damo nga mga kapitanes ngan opisyales ha barangay in mawawarayan pwesto kun magkaada hin “merging” o pag-urusa hin mga barangay denhi ha Tacloban City.
Sumala kan City Administrator Atty Jojo Lacanilao, gin-iistudyuhan na yana han lokal nga pangobyernohan an posibilidad nga pagtarampohon in pira nga mga barangay ngan himoon nala nga usa. Pero ginklaro han opisyal nga deri ini segurado nga matutuman.
Igin-esplikar ni Lacanilao nga kukunsultahon pa nira an mga eksperto hini nga isyu, labi na an Department of Interior and Local Government.
Igindig-on han opisyal nga ini nga pag-istudyo in deri kapritso la, kundi an panuyo gud hini nga mapa-uruupay an serbisyo ngadto han katawhan.
Ira gihapon ginkikitakita an modelo han Ormoc City kun diin ha deri pala maiha nagin balaud na an pagtarampo hin 29 nga barangay nga nahimo nala nga tulo nga barangay.
Iginsumat pa ni Lacanilao nga ha kamatuoran damo nga barangay ha Tacloban in deri angayan nga magin barangay kay ha kadamo pa la han popolasyon, deri na mapasar an iba. Ha ilarum han balaud, kinahanglan may 5 Mil katawo ha kada barangay. Damo nga barangay han syudad in menos ha 5 Mil an popolasyon, pahayag pa han opisyal.
An Tacloban City in mayda 138 nga mga barangay. #
