Isumat.com/3:47PM, May 22, 2020
Nanawagan hi Mayor Arnel Tan han Tarangnan, Samar ha publiko nga deri tumagya ngan tim-os nga maghirot kontra han Covid-19 kay makuri hin duro an kahimtang han lugar kun diin damo nga residente an natatapnan han kagaw.
Ini an nagin mensahe ni Tan nga iya iginpabati durante han PRtv program nga “Durungganan” yana nga kulop. Sumala han alkalde, deri la harumamay an sakripisyo ngan paghimakuri han iya mga nasasakupan dara han local transmission nga natabo ha iya bungto. 21 nga mga Tarangnanon an natapnan han virus ngan padayon hira naghuhulat han resulta hin sobra 400 nga swab samples.
Partikular nga gintudlok ni Tan an deskriminasyon kontra ha ira sugad man an kamakuri han panginano han mga bungtuhanon basi katagan hira han panginahanglan labi na nga haros duha na ka bulan nga naka lockdown hira. Nagsumat hiya nga 1,200 nga pamilya ha Tarangnan an derekta nga apektado han lockdown.
Kasumpay hini, iya gin-awhag an katawhan nga sumunod gud han kamanduan han mga otoridad bisan kun apektado an mga pakabuhi kay an paghirot la an aton ig-aato kontra hini nga sakit nga waray pa tambal tobtob yana.
Padayon gihapon an panawagan han alkalde para hin kadugangan nga ayuda para ha ira. Pero panawagan niya ngadto han karuyag magpadangat hin bulig nga deri hingalimtan an aton kabugtu-an ha Eastern ngan Northern Samarf nga grabe an distroso nga iginbilin ni bagyo Ambo.
Sering pa ni Tan, kun mahihimo la pagtunga-on an ayuda. An katunga para ha ira ug an katunga para han mga biktima ni Ambo ha Eastern ngan Northern Samar. HI Tan an nagsering nga waray dako nga danyos ni Ambo ha ira munisipalidad.
Nagpasalamat an amay han Tarangnan han mga nabulig ngan maghahatag pa hin bulig ha ira ngan iya iginsaad nga kun umabot man an panahon nga magkinahanglan hin ayuda an iba nga bungto, andam gihapon an mga Tarangnanon pagpadangat hin hinabang.# (KEVIN SIOSANA)
