Isumat.com/2:54PM,May 22, 2020
Katapos hin lima ka adlaw nga waray mag proseso hin swab samples an Eastern Visayas Covid-19 Regional Testing Center, balik na liwat hira ha operasyon ngan nagapagawas hin resulta yana nga kulop ug ini nga batch nga ginkokomponer hin 53 nga samples an ngatanan negatibo ha covid-19.
Dida hini nga mga samples 11 an tikang ha Tarangnan; 8 ha Northern Samar; 8 ha Burauen; 7 ha probinsya han Samar, 5 ha Southern Leyte; 6 ha EVRMC; 2 ha Living Hope Hospital-Maasin City; 2 ha Sta Fe, Leyte; 2 ha Alangalang, Leyte; ngan tag-usa an tikang ha Leyte Provincial Hospital ngan Tacloban City.
Lakip denhi an ikatulo nga negatibo nga resulta ni Eastern Visayas Patient #5 nga taga Burauen, Leyte. Dara hini, hul-os na an iya katambal han virus ngan puede na hiya igka-urusa han komunidad, pahayag pa han DOH.
Pira anay ka adlaw nga waray confirmatory test an laboratoryo kay naubos an extraction ngan detection kits. Kakulop pala umabot an nasabi nga mga higamit kay nadelatar an pagdul-ong tikang ha Manila dara han epekto ni bagyo Ambo.
Hapagkayana, mayda pa sobra kuatro syentos nga swab samples an igpapailarum han confirmatory test ha EVRTC.
Ini an ikaduha nga semana han operasyon han nasabi nga laboratoryo. Subay han impormasyon nga nakadangat ha Isumat.com, 3 Mil nga testing kits an nakadangat ha EVRTC kakulop nga adlaw.
Nagpapabilin nga 26 ka tawo an nag positibo han virus ha Rehiyon Otso. # (KEVIN SIOSANA)
